Bağçasaraynıñ eski qısmından gaz çektirilüvi onıñ tarihiy özgünligini ğayıp etecek. Avgustnıñ 30-nda Qırım.Aqiqat Radiosı efirinde bu fikirni qırımtatar faali Edem Dudakov bildirdi.
“Şeerniñ eski qısmına gaz çekilmege başladı. Aslında, tarihiy yerlerde gaz boruları çekilmey – adet üzre elektrik qullanıla. Borular eski şeerniñ körünişini boza, onıñ tarihiy özgünligini ğayıp ete. Ancaq olar 7-nci mikrirayondan başlap, Salaçıqqa endiler ve aman-aman mezarlıqqace barıp yetti”, - dedi Dudakov.
Onıñ sözlerine köre, qurucılıq şirketi kerek olğan butün izinlerge saip degil, hususan arheologlardan alınğan soyuna.
Tafsilâtlıca – Kemikler üzerinde yapılğan qurucılıq: Bağçasaraydaki musulman mezarlığı üzerinden ne içün gaz keçirile
Bağçasaray şeeriniñ eski qısmında gaz çektirile. Faallerniñ sözlerine köre, bu yerli mezarlıqlar içün bir telüke teşkil ete – çoqqa barmay qurucılıq şirketi musulman qabristanına da barıp yeter, albuki anda işler faqat arheologlarnıñ nezareti altında ötkerilmeli.
