Link açıqlığı

Saatnıñ esas haberi

Adliyeci Yaltadaki «Hizb ut-Tahrir işi» iştirakçisiniñ «alı fenalaşqanı bağlı» şikâyetler azırlay


Arsen Cepparov, arhivden alınğan fotosuret
Arsen Cepparov, arhivden alınğan fotosuret

Adliyeci Ayder Azamatov Yaltadaki “Hizb ut-Tahrir işi”niñ iştirakçisi Arsen Cepparovnıñ “alı fenalaşqanınen bağlı” bir qaç şikâyet azırlay. Bu aqta avgustnıñ 29-nda Qırım.Aqiqatqa Azamatovnıñ özü ikâye etip berdi.

“Men SİZO ve tıbbiyet bölügi hadimleriniñ areketsizliklerinden dolayı, Arsen Cepparovğa kerek olğan tıbbiy yardım köstermegenlerine qarşı şikâyet etecem. Şikâyetni prokuraturağa ve Cezalarnı eda etüv Federal hızmetine berecem”, – dedi Azamatov.

Adliyeciniñ sözlerine köre, vesiqalar yaqın vaqıtta azır olacaq, amma olar ne vaqıt cevap berecegi belli degil.

Bir kün evel adliyeci Favebookta Arsen Cepparovnıñ “alı fenalaşqanı” aqqında haber etken edi.

Rostov-na-Donu SİZOsınıñ hadimleri şimdilik bu hususta açıq bir izaat bermedi.

Mayısnıñ soñunda Şimaliy Kavkaz okrugınıñ arbiy mahkemesi Yaltadaki “Hizb ut-Tahrir işi” niñ altı figurantınıñ tevqif müddetini üç ayğa uzattı.

Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada tutuldı. Olar Rusiyede yasaq etilgen “Hizb ut-Tahrir” siyasiy İslâm teşkilâtına alâqadar olğanında qabaatlana.

Rusiye arbiy mahkemesi Yaltadaki “Hizb ut-Tahrir işi” ni Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinleri Rostov-na-Donu şeerine yollanıldı.

Ukraina Tış işleri nazirligi Rusiyeden Yaltadaki “Hizb ut-Tahrir işi” figurantlarınıñ azat etilmesini talap ete.

“Hizb ut-Tahrir” halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi “Hizb ut-Tahrir” teşkilâtını “terrorist” birleşme cedveline kirsetip, onı yasaq etti.

“Hizb ut-Tahrir işi” boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG