Avgustnıñ 29-nda saba evinde tintüv yapılğan aqmescitli Ukrain medeniyet merkeziniñ faali Olga Pavlenko Qırımdaki Rusiye Tahqiqat Komitetiniñ baş idaresinde sorğulandı. Bu aqta Qırım.Aqiqat muhbiri haber etti.
Haber etilgenine köre, Pavlenko tintüvden dolayı sorğulanğan. Alınğan ilk malümatqa binaen, ukrain faaline nisbeten tahqiqat teşkerüvi alınıp barıla eken.
Qırım.Aqiqat muhbiri Pavlenko sorğulav incelikleri aqqında aytmağa red etkenini bildire.
Rusiye Tahqiqat Komiteti bu husus boyunca açıq izaat bermedi.
Avgustnıñ 29-nda rusiyeli telükesizlik hadimleri Rusiyede yasaqlanğan “Pravıy sektor”nen onıñ ve aile azalarınıñ alâqası olğanında şeklengen Ukrain medeniyet merkeziniñ (UMM) faali Olga Pavlenkonıñ evinde tintüv ötkerdi.
Faalniñ tanışları onıñ evindeki tintüvni Ukrain medeniyet merkeziniñ işinen bağlı malümatnıñ ”Russkaya vesna” saytına berilgeninen bağlaylar
Bu yıl aprel ayında Qırımdaki Ukrain medeniyet merkeziniñ faalleri Olena Popova ve Olga Pavlenkonı Aqmescitniñ rusiyeli prokurorınıñ üyken yardımcısı Aleksey Puçkov “subet” keçirmege çağırğan edi. Prokuratura hadimi Merkezniñ işi ve “Krımskiy teren” gazetasınıñ neşirinen meraqlanğan. Faaller özü ve yaqınlarına qarşı şaatlıq bermeme aqqından faydalanğan.
Qırımdaki Ukrain medeniyet merkezi siyasiy bir teşkilât degil. Onı faaller yarımadada ukrain medeniyetini saqlamaq ve populârlaştırmaq maqsadınen teşkil etken ediler. Bu arada Merkez iştirakçilerine tazyıq yapılmaqta: olar telükesizlik organları tarafından sorğulav ve “subetlerge” çağırıla, ekstremizmge yol berememezlik hususında tenbiylene. Qırımdaki Ukrain medeniyet merkeziniñ faallerinden biri olğan Leonid Kuzmin telükesizlik hadimleri tarafından yapılğan basqı ve qorquzuvlardan soñ 2017 senesi yarımadanı terk etmege mecbur qalğan edi.
