Aqmescitteki “Hizb ut-Tahrir işi”niñ iştirakçileri Uzeir ve Teymur Abdullayev, Ayder Saledinov, Rustem İsmailov ve Emil Cemadinovnıñ Rostov-na-Donı şeeriniñ SİZOsına yollanılması, halqara qanunnamege zıt kele. Bu aqta avgustnıñ 29-nda Qırım.Aqiqat Radiosı efirinde qırımlı adliyeci Emil Kurbedinov ikâye etip berdi.
“Ukraina vatandaşlarınıñ bu şekilde Rusiyege yollanılması – halqara gumanitar uquq, Jeneva şartnamesi, PASE rezolütsiyası ve halqara uquqqa zıt kele. Bu bir arbiy cinayet dep tanıla”, – dedi Kurbedinov.
Onıñ sözlerine köre, Rusiye yollav “pek şiddetli” şartlarda keçe.
“Yollav ne içki, ne de halqara normalarğa uymay. Olarnı eşyalarınen beraber “bardaq” denilgen üceyrelerde taşıylar. Olar bütünley qapalı ola. Olar bir qaç künlük yolculıq yapa, atta bazen Krasnodar tahqiqat izolyatorında bir qaç ay keçireler. Olar epsi terrorist olaraq tanılğanı içün, olarğa nisbeten munasebet de oña köredir, işte”, – dep ilâve etti adliyeci.
Mevzuğa dair: ”Ekstremzim tapılmaq kerek”: Qırımda Rusiye mahkeme sistemasınıñ hususiyetleri
“Hizb ut-Tahrir” halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi “Hizb ut-Tahrir” teşkilâtını “terrorist” birleşme cedveline kirsetip, onı yasaq etti.
“Hizb ut-Tahrir işi” boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
