Rusiyeli akimiyeti planlaştırğan Salğır özeniniñ temizlenüvi – kerek bir iş, lâkin mesele onıñ fiyatı ve temizlev usulınen bağlı. Avgustnıñ 29-nda Qırım.Aqiqat Radiosı efirinde bu fikirni Qırım ekologik eyial merkeziniñ yolbaşçısı Anton Kovalçuk bildirdi.
“Elbette, özenlerniñ yataq yollarını kerekli vaziyette tutmaq pek zarurdır. Mesele bunıñ fiyatı ve temziev usulınen bağlı. Kölemli leyhanı amelge keçirüv – bar olğan ekosistemağa er zaman kelişmey bile. Şubesiz ki – paralarnıñ menimsenüvinde bir orta bir yol ve adekvatlıq olması şart”, - dep saya o.
Onıñ sözlerine köre, ilk başta esas ve yanında yerleşken özenlerdeki çöplüklerni temizlep almalı.
“Şubesiz zarur olğan şey – çöplük ve yıqılğan tereklernñ toplanuvınen ve sairenen alâqalı. Yani özenniñ aqışına keder etken unsurlarnı temizlemeli. Terenleştirüvge maksimum diqqatlı yanaşmalı: artqaç teşebbüs kereksizdir. Tabiatnıñ özü eñ yahşı ressamdır”, – dep ilâve etti o.
Avgustnıñ 23-nde Aqmescitniñ rsuiyeli memuriyetiniñ başı İgor Lukaşov, Salğır özeni ile diger daa ufaq özenlerniñ temizlenüvi 100 million rubleden ziyade (qararnen 42 million grivna –QA) tutacağını bildirgen edi. Temizlev 2019 senesi yapılaсaq.
Aqmescitniñ içinden keçken Salğır özeni çoqtan berli körümsiz alda. Qırım sakinleri ictimaiy ağlarda özenge baqılmağanından şikâyetçi.
