Qırımdaki Ukrain medeniyet merkeziniñ faali Olga Pavlenko Aqmescitte Rusiye Tahqiqat Komitetine sorğulanmaq içün çağırıldı. Bu aqta oña avgustnıñ 29-nda tintüv yapqan soñ Rusiye FSB hadimi haber etti, dep ikâye ete faal Qırım.Aqiqatqa.
«Tintüvden soñ maña Aqmescitniñ Tahqiqat Komitetine barmaq kerek olacaq dediler.Men bellesem, adliyecimniñ işi bitken soñ bugün anda bararım”, – dep iza etti o.
Pavlenko ayrıca tintüv üç saat devam etkeni ve adliyeci de bulunğanı aqqında aytıp berdi.
“Er şey saba saat altı bucuqta ev qapısı qaqılğandan soñ başlandı. Alt qatta yaşağanlardan biriniñ evini bizden dolayı suv basqan eken dep ayttılar. Açmağa red ettim, olar ise ayaqlarınen qapını tepip başlayaraq, politsiya çağırarmız dep qorquzdılar. Men ise, şimdi özüm politsiyanı çağırarım dep cevap berdim. Neticede kim olğanını aytmaqtan ğayrı başqa çare qalmağan soñ,FSB kelgenleri ve ellerinde tintüvnen boyunca mahkeme qararı olğanını ayttılar”, - dep ikâye etti o.
Tintüvnen bağlı qararda, Pavlenko qomşu Rusiyede yasaqlanğan “Pravıy sektor”nen alâqası olğanında şeklengeni aqqında yazılğan. Tintüvden soñ faalniñ şahsiy eşyaları, şu cumleden, şiirler olğan defter musadere etilgen.
“Biz adliyeciniñ kelgenini bekledik ve ancaq bundan soñ olar kirip, maña Ukrainanıñ qıta qısmında faaliyet köstergen “Pravıy sektor” terroristik teşkilâtınen alâqam olğanında şeklengenim aqqında yazılğan qararnı taqdim etti. Qararda Qırımdaki bir şahısnıñ ayatını htelükege tüşürgen bir gruppa insanlarnıñ adı yazılğan edi. Tintüv üç saat devam etti. FSB hadimleri yanında bir qaç saat da bar edi.Menim şiir ve türküler yazılğan defterimni musadere etip, olar illâ ki, ekstremistik mundericelidir dep ayttılar. Aynı zamanda telefon ve USBler musadere etildi”, – dep ilâve etti Pavlenko.
Telükesizlik hadimleri Rusiyede yasaqlanğan “Pravıy sektor”nen onıñ ve aile azalarınıñ alâqası olğanında şeklengen Ukrain medeniyet merkeziniñ faali Olga Pavlenkonıñ evinde tintüv yapılğanı aqqında daa evel haber etilgen edi.
Bu yıl aprel ayında Qırımdaki Ukrain medeniyet merkeziniñ faalleri Olena Popova ve Olga Pavlenkonı Aqmescitniñ rusiyeli prokurorınıñ üyken yardımcısı Aleksey Puçkov “subet” keçirmege çağırğan edi. Prokuratura hadimi Merkezniñ işi ve “Krımskiy teren” gazetasınıñ neşirinen meraqlanğan. Faaller özü ve yaqınlarına qarşı şaatlıq bermeme aqqından faydalanğan.
2017 senesi avgustnıñ 26-nda Qırımdaki Ukrain medeniyet merkeziniñ faalleri ukrain ve rus tilinde çıqqan “Krımskiy teren” gazetasınıñ ilk deneme nushasını taqdim etken ediler.
Qırımdaki Ukrain medeniyet merkezi siyasiy bir teşkilât degil. Onı faaller yarımadada ukrain medeniyetini saqlamaq ve populârlaştırmaq maqsadınen teşkil etken ediler. Bu arada Merkez iştirakçilerine tazyıq yapılmaqta: olar telükesizlik organları tarafından sorğulav ve “subetlerge” çağırıla, ekstremizmge yol berememezlik hususında tenbiylene. Qırımdaki Ukrain medeniyet merkeziniñ faallerinden biri olğan Leonid Kuzmin telükesizlik hadimleri tarafından yapılğan basqı ve qorquzuvlardan soñ 2017 senesi yarımadanı terk etmege mecbur qalğan edi.
