Aqmescitli ukrain faali Olga Pavlenkonıñ qızı Alina Qırım.Aqiqatqa izaat bergeninde, daa evel kerçekten de “Pravıy sektor” azası olğanını, al-azırda ise bu teşkilâttan çıqqanı aqqında haber etti.
“Men bir yıl devamında kerçekten de “Pravıy sektor” terkibinde Donbassta cenkleştim, şimdi ise bu teşkilâttan çıqtım. Bu tintüvden evel operativci hadimler bizim evimizge “çay içmege” kelgen ediler. Anamdan maña telefon açıp, Qırımğa qaytmağa qandırmasını rica etkenler”, – dep ikâye etti Alina Pavlenko.
O, onıñ ana-basın “Pravıy sektor”nen alâqası olmağanını ilâve etti.
“Ne anam, ne de babamnıñ bu teşkilâtnen alıp berecegi yoq. Bundan da ğayrı, olar meni “Pravıy sektor”de barıp hızmet etmekten vazgeçirmege areket etken”, – dep qoştı Alina Pavlenko.
Material derc etilgen maalgece rusiyeli telükesizlik organları iç bir izaat bermedi.
Telükesizlik hadimleri Rusiyede yasaqlanğan “Pravıy sektor”nen onıñ ve aile azalarınıñ alâqası olğanında şeklengen Ukrain medeniyet merkeziniñ faali Olga Pavlenkonıñ evinde tintüv yapılğanı aqqında daa evel haber etilgen edi.
Bu yıl aprel ayında Qırımdaki Ukrain medeniyet merkeziniñ faalleri Olena Popova ve Olga Pavlenkonı Aqmescitniñ rusiyeli prokurorınıñ üyken yardımcısı Aleksey Puçkov “subet” keçirmege çağırğan edi. Prokuratura hadimi Merkezniñ işi ve “Krımskiy teren” gazetasınıñ neşirinen meraqlanğan. Faaller özü ve yaqınlarına qarşı şaatlıq bermeme aqqından faydalanğan.
2017 senesi avgustnıñ 26-nda Qırımdaki Ukrain medeniyet merkeziniñ faalleri ukrain ve rus tilinde çıqqan “Krımskiy teren” gazetasınıñ ilk deneme nushasını taqdim etken ediler.
Qırımdaki Ukrain medeniyet merkezi siyasiy bir teşkilât degil. Onı faaller yarımadada ukrain medeniyetini saqlamaq ve populârlaştırmaq maqsadınen teşkil etken ediler. Bu arada Merkez iştirakçilerine tazyıq yapılmaqta: olar telükesizlik organları tarafından sorğulav ve “subetlerge” çağırıla, ekstremizmge yol berememezlik hususında tenbiylene. Qırımdaki Ukrain medeniyet merkeziniñ faallerinden biri olğan Leonid Kuzmin telükesizlik hadimleri tarafından yapılğan basqı ve qorquzuvlardan soñ 2017 senesi yarımadanı terk etmege mecbur qalğan edi.
