Eger Rusiyede artıq üç aydan ziyade açlıq tutqan ukrainalı rejissör Oleg Sentsov ölse, Rusiye prezidenti Vladimir Putinge qarşı bu pek “büyük bir darbe” olacaq. Bu fikirne Qırım.Aqiqat Radiosı efirinde rusiyeli siyasetşınas Dmitriy Oreşkin bildirdi.
“Olar (Kremlde –QA) Sentsovnı qorquzmaq, sındırmaq, satın almaq mumkün olur dep belledi. Aslında, er kes yaşamaq ister. O ise, teslim olmay. Allah köstermesin, eger o ölse, Putin içün bu pek büyük bir darbe olur. Kremldekiler bunı pek yahşı añlay”, - dedi Oreşkin.
Mevzuğa dair: ”Rusiye Sentsovnı bazarlıq yapmaq içün qullana”
Avgustnıñ 15-nde belli olğanına köre, Yamalo-Nenetskiy muhtar okrugı açlıq tutqan ukrain rejissörı Oleg Sentsov içün onıñ anası Lüdmila ve Kyiv patriarhlığı Ukrain provoslav kilisesiniñ Aqmescit ve Qırım arhiepiskopı Kliment bergen mefa muracaatını qabul etmedi.
Kremlde aytılğanına köre, açlıq tutqan Sentsov mefa etilmesi içün Rusiye prezidenti Vladimir Putinge şahsen özü muracaat etmek kerek eken.
Oleg Sentsov mayısnıñ 14-nde Rusiye apishanelerinde yatqan bütün ukrainalı siyasiy mabüslerniñ azat etilmesi talabınen müddetsiz açlıq ilân etken edi. O, mayısnıñ 31-nde «onı deñiştirüv meraqlanmayıp», «soñuna qadar baracaq insan olğanını» ilân etken edi.
Sentsov ve Qırım sakini Aleksandr Kolçenko Rusiye mahsus hizmetleriniñ hadimleri tarafından Qırımda 2014 senesi mayıs ayında, yarımadada terroristik aktlar azırlağanlarında qabaatlanıp tutulğan ediler. 2015 senesi avgust ayında Rostov-na-Donu şeerindeki Şimaliy Kavkaz okrugınıñ arbiy mahkemesi Sentsovnı, Qırım territoriyasındaki terroristik faaliyette qabaatlap, 20 yıllıq şiddetli rejim koloniya cezasına mahküm etti. Kolçenkoğa 10 yıl apis cezası berildi. Ekisi de qabaatını tanımay.
“Memorial” uquqimaye merkezi Sentsov ve Kölçenkonı siyasiy mabüsler cedveline kirsetti.
