Avgustnıñ 29-nda Aqmescitte Ukrain medeniyet merkeziniñ faali Olga Pavlenkonıñ evinde tintüv yapıla. Bu aqta Qırım.Aqiqat muhbiri haber etmekete.
Faalniñ tanışları onıñ evindeki tintüvni Ukrain medeniyet merkeziniñ işinen bağlı malümatnıñ ”Russkaya vesna” saytına berilgeninen bağlaylar.
“O, tüntüv yapılacağını bir-eki aftadan berli bekşey edi. Em de hususan onıñ noqta-i nazarı ve UMM faaliyeti aqqında işbu saytta yazılğanından soñ. Oña tanış olmağan nomerlerden telefon aşqanlar olğan. Qorquzmağanlar amma, daa ziyade, maneviy tazyıq yapqanlar”, – dep ikâye etti Qırım.Aqiqat muhbirine onıñ tanışı.
Qırım.Aqiqat vaziyetni taqip altında tuta.
Bu yıl aprel ayında Qırımdaki Ukrain medeniyet merkeziniñ faalleri Olena Popova ve Olga Pavlenkonı Aqmescitniñ rusiyeli prokurorınıñ üyken yardımcısı Aleksey Puçkov “subet” keçirmege çağırğan edi. Prokuratura hadimi Merkezniñ işi ve “Krımskiy teren” gazetasınıñ neşirinen meraqlanğan. Faaller özü ve yaqınlarına qarşı şaatlıq bermeme aqqından faydalanğan.
2017 senesi avgustnıñ 26-nda Qırımdaki Ukrain medeniyet merkeziniñ faalleri ukrain ve rus tilinde çıqqan “Krımskiy teren” gazetasınıñ ilk deneme nushasını taqdim etken ediler.
Qırımdaki Ukrain medeniyet merkezi siyasiy bir teşkilât degil. Onı faaller yarımadada ukrain medeniyetini saqlamaq ve populârlaştırmaq maqsadınen teşkil etken ediler. Bu arada Merkez iştirakçilerine tazyıq yapılmaqta: olar telükesizlik organları tarafından sorğulav ve “subetlerge” çağırıla, ekstremizmge yol berememezlik hususında tenbiylene. Qırımdaki Ukrain medeniyet merkeziniñ faallerinden biri olğan Leonid Kuzmin telükesizlik hadimleri tarafından yapılğan basqı ve qorquzuvlardan soñ 2017 senesi yarımadanı terk etmege mecbur qalğan edi.
