İlhaq etilgen Qırımda qırımtatar tilinde tasil bergen 16 dane mektepten yedi danesi qaldı. Bu aqta avgustnıñ 27-nde Qırım.Aqiqat Radiosı efirinde Qırımtatar Milliy Meclisiniñ azası Eskender Bariyev ikâye etip berdi.
“Qırım tasil, ilim ve gençlik denilgen nazirlikniñ malümatına köre, 2017/2018 seneleri qırımtatar tilinde tasil bergen 7 dane munitsipal orta tasil muessisesi, rus ve qırımtatar tillerinde tasil bergen - 4 dane ve statusını qırımtatar tilinden umumiy tasil berüv şekline avuştırğan beş dane umumtasil muessiseleri çalışmaqta. Yani tasil tili belgilenmegen soylârı”, - dedi Bariyev.
Qırımdaki Ukrain medeniyet merkeziniñ faali Leonid Kuzminniñ sözlerine köre, ukrain tiliniñ ögrenilüvi daa da muşkül alda.
“Qırım ilhaq etilgen maalgece çalışqan 7 ukrain mektebinden iç biri qalmadı. Epsi ya rus tilinde, ya da ukrain tilleri olğan soylârında qarışıq tillerde tasil berip başladı. Lâkin rus tilinde tasil bergen soylârı daa da ziyade. Aqmesdcitteki ukrain gimnaziyası açıq-aydın bir misaldir”, - dep ayta Kuzmin.
İlhaq etilgen Qırımnıñ rusiyeli akimiyeti umumtasil orta mekteplerde qırımtatar ve ukrain tillerindeki ders saatlarını minimumğa endirdi. Akimiyet qırımtatarlarnı ana tilinde tasil aluv imkânından marum etkeni aqqında Qırımtatar Milliy Meclisiniñ temsilcileri aytqan edi.
Bu arada yarımada ilhaq etilgen soñ yarımadada qabul etilgen “Qırım Cumhuriyeti Anayasası”nıñ 10-ncı maddesi qırımtatar, ukrain ve rus tillerine devlet tili statusı bere.
