Rusiyenen Azaq deñizi boyunca tizilgen muqaveleni lâğu etmege olmay, çünki bu Rusiye tarafından territorial davanıñ açılmasına imkân berer, dep bildirdi Avropa integratsiyası meseleleri boyunca tış işler naziriniñ (TİN) muavini Olena Zerkal, Ukrainanıñ çetel diplomatik vekâlethane başlarınıñ XIII mahsus toplaşuvında, dep haber etile TİN Twitter saifesinde.
“Rusiye Federatsiyasınen Azaq deñizi boyunca muqaveleniñ lâğu etilmesi aqqında söz yürsetmege bile olmay - bu RF tarafından territorial davanıñ açılmasına yol bere. Bizim içün bu havfsızlıq meselesi, bu sebepten biz bu meseleni çezmek içün elimizde olğan vastalarnı qullanamız” – dep bildirdi Zerkal.
Ukraina ve Rusiye arasında Azaq deñizi ve Keriç boğazınıñ beraberlikte qullanması aqqında muqavele 2003 senesi imzalanğan edi.
Soñki vaqıtlarda Rusiye, Keriç boğazından çetel gemileriniñ keçüvinde manialar çıqara.
İyülniñ 10-nda Ukraina Yuqarı Radasında “Ukraina Yuqarı Radasınıñ prezident, mudafaa nazirine Ukraina ve Rusiye arasında Azaq deñizi ve Keriç boğazınıñ beraberlikte qullanması aqqında muqavelesinen bağlı muracaat” №8583 qarar leyhası qayd etildi.
Qararnıñ müellifleri, gemicilik serbestliginiñ bozulması, Rusiye FSB-niñ Azaq deñizindeki Ukraina limanlarına gemilerniñ kirmesini toqtatması ve mania çıqarması devamlı sürette olğanını qayd ete ve prezidentke bir daa Rusiye ile tizilgen mezkür muqaveleniñ lâğu etilmesi ve Azaq deñizinde devlet sıñırınıñ sıñırlandırılması boyunca qanun leyhasını berilmesini teklif ete.
Ukraina infraterkip naziri Volodımır Omelyannıñ sözlerine köre, Azaq deñizini blok etkeni sebebinden Ukraina AQŞ ve Avropa devletlerinen Rusiyege qarşı sanktsiyalar kirsetilüvi boyunca körüşüvler ötkere.
2014 senesi mart ayında Rusiye Ukrainağa bağlı Qırım yarımadasını ilhaq etken edi. Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.
