Qırımtatar Milliy Meclisiniñ reisi Refat Çubarov, AQŞ Devlet departamenti tarafından ilân etilgen “Qırım beyannamesi”niñ semereliligi ilk-evelâ Ukrainanıñ areketlerine bağlı dep saya.
““Qırım beyannamesi” ilân etilgende Mustafa Cemilev AQŞnı ziyaret ete edi. Er şey keliştirilerek, “Qırım beyannamesi” oña taqdim etildi. Bunen olar qırımtatar halqı, Ukraina ve umumen Qurum meselesine sayğı köstergenlerini numayış etken ediler. “Qırım beyannamesi” – prezident ve (AQŞ – QA) ükümetniñ pozitsiyası. Böyleliknen Berleşken Devletler siyasetini şekillendirgen devlet organları pozitsiyasınıñ dairesi kilitlendi”, - dep ayttı Çubarov “112 Ukraina” kanalınıñ efirinde.
Onıñ sözlerine köre, AQŞ “Rusiyeniñ Uktrainağa qarşı tecvuzı ve Qırımnıñ ilhaqına nisbeten siyasetiniñ bütünligini numayış etti”.
Avgustnıñ 24-nde AQŞ prezidentiniñ havfsızlıq boyunca mesleatçısı John Bolton Qırım ilhaqınıñ tanılmaması, Amerikanıñ qanunsız ilhaqlarnı tanımama ananesine esaslanğanını aytqan edi.
İyülniñ 25-nde AQŞ devlet kâtibi Mayk Pompeo, Qoşma Ştatlar Rusiye ilhaq etken Qırımnı iç bir vaqıt tanımaycağı aqqında yazılğan «Qırım beyannamesi» çıqardı. Pompeo ileride de Ukrainanıñ topraq bütünligi tiklenmesinde israr etecek dep ayttı.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
