Kreml nezareti altındaki Aqmescitniñ Kievskiy rayon mahkemesi Bağçasaraydaki «Hizb ut-Tahrir işi» iştirakçileriniñ apis muddetini uzattı.
Server Zekiryayev, Marlen Asanov, Ernes Ametov ve Memet Bilâlov oktâbrniñ 9-na qadar SİZOda qalacaq dep haber ete Qırım.Aqiqat muhbiri.
Marlen Asanovnıñ ömür arqadası Ayşeniñ sözlerine köre, qabaatlağan tarafnıñ delilleri deñişmey.
«Şaşılacaq bir şey amma, mahkeme açıq keçti – anda eñ yaqın soy-soplar kirsetildi. Prokuror ve mahkemecilerniñ sözlerini bizler artıq ezberledik ve olar “cemiyet içün havflı olğan pek telükeli cinayetçi ekenliginen” bağlıdelilleri sözme-söz tekrarladı. Şunıñ içün olarnı ev apsine bile yibermek havflı eken. Aqayım mahkemede, adiy insanlar üzerine terrorist tamğası asıla, albuki yalan qabaatlavlarnen olarnı apishanelerge qapatqan şahıslarnıñ özleri terrorist olğanı aqqında pek yahşı etip ayttı”, - dep ikâye etti Ayşe Asanova.
O ayrıca, aqayını tişleri raatsızlap başlağanı aqqında da söyledi.
“Eki tişi ufanıp ketkeni aqqında aytıp, meni bayağı mağayttı. Tedaviy yapsınlar dep ariza yazsın dedim. O, SİZOda tişlerni tedavi etmey, aman suvurıp taşlaylar dedi. Lâkin umumen alğanda özlerini yahşı is eteler. Er keske selâm eteler”, – dedi o.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan “Hizb ut-Tahrir” teşkilâtınıñ azaları olğanında qabaatlay.
2018 senesi mayısnıñ 21-nde Qırımda «Qırım birdemligi»niñ koordinatorı Server Mustafayev ve qırımtatar musulmanı Edem Smailov tutulıp alınğan edi. Olarnıñ işi Bağçasaraylı “Hizb ut-Tahrir işi”nen birleştirildi.
“Hizb ut-Tahrir” halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi “Hizb ut-Tahrir” teşkilâtını “terrorist” birleşme cedveline kirsetip, onı yasaq etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
