Qırımda Rusiye Tahqiqat Komiteti idaresiniñ tahqiqatçısı Dmitriy Kosyakin, Zello internet ağı vastasınen ekstermizmge çağıruvda qabaatlanğan Novıy Mir köyüniñ sakini İsmail Ramazanovnıñ üç aqrabası sorğulandı.
Ramazanovnıñ babası –Seitnebi, anası Aliye ve qardaşı Enver sorğulanuvı cinaiy iş çerçivesinde yapıldı dep haber ete Qırım.Aqiqat muhbiri.
“Tahqiqatçı, İsmailden ğayrı soy-sopları arasından onıñ telefonını kim qullandı ve odasına kimler kirip ola edi, ondan ğayrı evde kimler yaşay edi degen sualler bergen. Ayrıca tahqiqatçı tintüv esnasında onıñ evine ketirilip taşlanğan patronlar aqqında sorağan. Rusiye Anayasasınıñ 51-nce maddesine dayanaraq, aqrabalarnıñ epsi subetleşmekni red etken”, - dep ayttı Qırım.Aqiqatqa uquqçı Edem Semedlâyev.
İsmail Ramazanov yanvarniñ 23-nde tevqif etilgen edi. Aynı künü onıñ Novıy Mirdeki evinde tintüv ötkerildi. Rusiye Tahqiqat komiteti onı Zello internet-radio vastasınen ekstremzim propagandası yapqanında qabaatlağan edi.
Ekstremzim propagandası yapqanında qabaatlanğan İsmail Ramazanov iyülniñ 14-nde SİZOdan çıqtı, çünki bu cinaiy iş boyunca qabaatlanğanlarnı yarım yıldan ziyade apiste tutmaq yasaqtır.
Avgustnıñ 2-nde, Ramazanovnen alâqalı cinaiy iş ilâve tahqiqat içün keri qaytarılğanı aqqında belli oldı.
