Aqmescitniñ merkezinde «Narazılıq meydanı” faali, qırımtatar Vatan Karabaşnıñ özüni yaqma teşebbüsi çaresizlik neticesidir. Qırım.Aqiqatqa avgustnıñ 3-nde böyle bir fikirni Qırımtatar Milliy Meclisi reisiniñ muavini Ahtem Çiygoz bildirdi.
“Me buñı çaresizlikniñ bir şekli der edim. İnsanlar ictimaiy ağlarda yapılğan paylâşuv ve izaatlardan artıq başqa areketlerge keçeler. Endi halqımıznıñ küreşine özüni yaqmaq da kirer”, – dedi Çiygoz.
Onıñ sözlerine köre, “narazılıq meydanı”nıñ faalleri rusiyeli memurlar olranıñ meselesini çezer degen ümütleri boşuna çıqtı.
“Afsus ki, bu gruppa (“narazılıq meydanı”nıñ faalleri –QA) Qırımda Rusiye bayrağını kötergen ilk gruppadır. Olar esasen, ümüt ve eminliknen, Aksönov, işğalci akimiyet, Moskvadaki akimiyet bir adalet ketirir dep muracaat etken ediler. Bu arada olar işğalge qarşı yürsetilgen umumiy küreşten uzaqlaşqan ediler. Umumiy küreşten ulaqlaşuv – bir fayda ketirmedi. Bugünki adım – bizim semetdeşlerimiz atqan çaresizlik adımıdır”, - dep qoştı Çiygoz.
Vatan Karabaş aqqında onıñ evli olğanı ve üç balası bar ekenligini bilemiz.
Diqqat! Dehşet kontent!
Avgustnıñ 3-nde Aqmescitniñ merkezinde “Strelkovaya” “narazılıq meydanı”nıñ faali Vatan Karabaş özüni yaqmaq niyetinen, üzerine yanıcı şingenlik tökerek, özüni yaqıp yiberdi, ancaq etrafındakiler ateşni söndürip yetiştirdi. Özüni yaqmazdan evel bu kişi özüni, akimiyetniñ aqsızlığını qarşı narazılıq bildirerek yaqqanı aqqında ayttı.
Oquñız: «Krıumskaya roza»ğa qarşı küreş: Aqmescit civarındaki«narazılıq meydanında» qurucılıq başlay
Rusiyeli telükesizlik hadimleri avgustnıñ 2-nde Aqmescit etrafında qurulacaq “Krımskaya roza” mesken rayonında qora qoyulmasına qarşı çıqqan yerli sakinler narazılıq bildirgen yerge keldiler.
Avgustnıñ 3-nde faaller “narazılıq meydanı”nda keçken vaqialar sebebinden Aqmescitniñ rusiyeli memuriyetine barmağa planlaştırlalar.
İlhaq etilgen Qırımnıñ rusiyeli memuriyet temsilcileri qırımtatarlarnıñ evleri turğan topraq damartılarını satalar. Qurucılıq yapacaqlar işlerini satın alınğan topraqlarını qoralamaqnen başalay. İşte, yerli sakinler buña qarşı çıqalar.
Qırımtatarlar ev qurğan “Strelkovaya” “narazlıq meydanı”nıñ yerinde 9 biñ kişilik yañı rayon qurmağa isteyler. Mesken evlerden ğayrı, mektepler, bala bağçaları, sport meydanları ve tükânlar qurmağa azırlanalar. Şimdilik anda esasen avdet etkenler (repatriant) yaşay.
