Qarasuvbazarda (Belogorsk) rusiyeli politsiya hadimleri qırımlı uquqimayeci Abdureşit Cepparovnıñ evine kelip, mayıs ayında teşkil etilgen ve esas maqsadı «qırımtatar milliy areketini canlandırmaq” olğan “Qırım ğayesi” ictimaiy areketiniñ faaliyeti aqqında sorav keçirmege kelgenler.
İyülniñ 31-nde Qırım.Aqiqat muhbirine bu aqta Cepparov haber etti.
«Bugün aqşam saat 17.30de evime beyaz “Niva”da politsiyanıñ üç hadimi keldi. Beyaz kölmek kiygen eki hadim maşna içinde qaldı, qara forma kiygen üyken leytenant ise mennen subetleşmek içün çıqtı. O, Rusiye İİN Qarasuvbazar rayonında cinayet qıdıruv bölüginiñ hadimi olğanını ayttı. Adı Muratov Nariman Rustamoviç eken. Aqmescitten, “Qırım ğayesi” ictimaiy areketiniñ faaliyeti aqqında sorav keçirmege avale etilgeni aqqında haber etti», – dep haber etti uquqimayeci.
Cepparovnıñ sözlerine köre hadim, elinde Qırım.Aqiqatnıñ bazar künü Qarasuvbazarda “Qırım ğayesi”niñ faalleri toplanğanı aqqındaki habernen bağlı kâğıt tutaraq, uquqimayeci berilecek “pek çoq sual toplanğanını” aytqan.
“Fotosurette körüngen faallerniñ adını aytmağa rica etti, hususan Rolan Usmanovnen meraqlandı. Onıñ iç bir sualine cevap bermedim ve yarın saat 16da menim adliyecim yanımda olğanında kelmege teklif ettim”, – dep ikâye etti Qırım.Saqiqatqa uquqimayeci.
Rusiye telükesizlik organları bu hususnen bağlı izaat bermedi.
Mayısnıñ 27-nde Qarasuvbazarda qırımlı faaller ötkergen körüşüvde “Qırım ğayesi” ictimaiy areketiniñ teşkil etilecegine qarar berildi.
İyülniñ 29-nda “Qırım ğayesi”niñ faalleri Qarasuvbazarda keçken toplaşuvda öz faaliyetiniñ esas maqsadına dair qarar qabul etti. Areketniñ esas faaliyeti qırımtatar milliy areketini canlandırıluvı olacaq ve bu maqsatnen olar Qırımnıñ çeşit regionlarında körüşüvler keçirmek içün faaller ağını quracaq.
Rusiye Qırımnı ilhaq etken soñ, mustaqil jurnalistler, cemaat ve qırımtatar Milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında qabaatlanğan musulmanlarnıñ evlerinde sıq-sıq tintüvler keçirip başladı.
