Qırımtatar Milliy Meclisi reisiniñ muavini Ahtem Çiygoz, ilhaqtan soñ Kreml nezareti altındaki memurlar onı «satın almaq» istegenleri aqqında ikâye etti. Bu aqta o Ukrainanıñ «Gordon» neşirine bergen intervyusında ikâye ettip berdi.
«İlhaq yapılğan soñ, olar uzun vaqıtqace meni satın almaq istedi. Aksönov, Belavantsev, Temirgaliyev (Sergey Aksönov – Kreml nezareti altındaki Qırım yolbaşçısı, Oleg Belavantsev – 2014-2016 seneleri arasında yarımadada Rusiye prezidentiniñ temsilcisi, Rustam Temirgaliyev – Qırımnıñ sabıq birinci vitse-premyeri- «Gordon») 2014 senesi baarde meni bir qaç sefer körüşmege davet etip, men ile işbirligi yapmağa azır olğanlarını aytqan ediler, ve, Mustafa Cemilev degeninden qaytmaz, halq arasında bizim itibarımız da olardan eksik degil... yani, aytacağım,ufaq ve ucuz bir qıyaslama yapqan ediler.Men diñlep, lafnı ne yerge alıp baracaqlarını beklegen edim. Dediler ki: «Ahtem ağa, siz – qırımtatarlar arasında belli ve körüngen insansıñız, qatiy bir küreşçi, bizge ise, Qırımda öz Ramzan Qadırovımız kerek», – dep ayttı Çiygoz.
Onıñ sözlerine köre, ilhaq etilgen Qırımda Rusiye akimiyetiniñ tarafdarı olğanlar işbirlik yapmaq içün para teklif etken.
«Birinci sefer 3 million dollar teklif ettiler. Raqamnı maña şahsen Aksönov ve Belavantsev telâffuz etti. Meselâ, Remzi İlyasovnı 300 biñ dollarğa satın alğan ediler. Eline yalıñız 70 biñ dollar berildi» – dep qayd etti Çiygoz.
Mevzuğa dair: Rusiyede« qazandılar»: Qırımda «milliy mesele» kuratorları nasıl eytip zenginleşti
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
