Rusiye baş naziri Dmitriy Medvedev ilhaq etilgen Aqyarğa keldi dep haber ete iyülniñ 28-nde Kreml nezareti altındaki Qırım yolbaşçısı Sergey Aksönov ictimaiy ağlarda.
«Rusiye ükümetiniñ yolbaşçısı Dmitriy Anatolyeviç Medvedevnen beraber Rusiye çoqundırılğanınıñ 1030 yıllığına bağışlanğan tantanalı kontsertte iştirak ettim», – dep yaza Aksönov Facebookta.
Yerli KHV malümatına köre, Medvedev Rusiye çoqundırılğanınıñ 1030 yıllığı munasebetinen «Rusiye hor sanatınıñ şah eserleri» adlı Sreten monastırı ötkergen «Hersones-Tavriçeskiy» muzey qoruğındaki kontsertni ziyaret etken.
Medvedev Aqyarnı soñki defa 2017 senesi avgust ayında ziyaret etken edi.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
