Canada ükümeti iyülniñ 28-nde öz beyanatını bidirip, Rusiye tarafından qanunsızilhaq etilgen ukraina yarımadası bağlı noqta-i nazarını tasdıqladı. Ottavanıñ fikrine köre, bu adım «iç bir devlet küç qullanaraq başqa devletniñ sıñırını deñiştirip olamaycağına dair muim halqara normalarnı» boza.
«Canada Ukraina topraq bütünligini ürmet etkenini tasdıqlay ve Rusiyeniñ küç qullanaraq Qırım yarımadasını Rusiyege qoşmasınen bağlı areketlerini, şu cumleden 2018 senesi mayıs ayında Keriç boğazı üzerinden köpür açqanını da taqbih ete», – denilmekte vesiqada.
Canada aynı zamanda Qırımda insan aqları bozulğanı, hususan qırımtatarlar taqip etilgenine de işaret ete.
«Qanunsız şekilde tevqif etilgen, şu cumleden Oleg Sentsov kibi Rusiyege alıp ketilerek, bizler Qırımda uquqçılığını tanımağan mahkemeler tarafından mahküm etilgen bütün ukrain vatandaşlarını azat etmege çağıramız», – dep qayd ete Canada ükümeti.
Soñki zamanda Ğarpnıñ bir qaç devleti Ukrainanıñ topraq bütünligine qol tutıp, Qırım ilhaqını tanımağanını tasdıqladı.
İyülniñ 25-nde AQŞ devlet kâtibi Mike Pompeo, Qoşma Ştatlar Rusiye ilhaq etken Qırımnı iç bir vaqıt tanımaycağı aqqında yazılğan «Qırım beyannamesi» yayınladı. Pompeo ileride de Ukrainanıñ topraq bütünligi tiklenmesinde israr etecek dep ayttı.
Rusiye TİN Pompeonıñ beyannamesini izaatlar eken, AQŞnıñ tış siyaseti istiqrarsız olğanı aqqında ayttı.
Ukraina prezidenti Petro Poroşenko Qırım ilhaqı tanılmağanınen alâqalı beyannameni alğışladı.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
