AQŞ temsilciler palatası mudafaağa umumen 716 milliard dollar masraf etilecegine dair qanun leyhası qabul etti. Bunıñ içinde Ukrainağa uçucı arbiy yardım olaraq berilecek 250 million dolar da bar. Bu aqta «Amerika sesi»niñ rus hızmeti haber ete.
Vesiqa aynı zamanda rusiye silâsı yerine amerikan silâsını satın alğanlar içün rağbetlendirgen tedbirler de kirsete.
Senat tasdıqlamaq kerek olğan qanun leyhasına palatada 359 kişi qolt tuttı, 54 qarşı çıqtı.
Qanun leyhasına binaen, Rusiyeden silâ satın alğan devletler, bundan soñ amerikan silâsına keçken taqdirde, AQŞ olarğa qarşı sanktsiyalar kirsetmeycegine işana bileler.
Bu şart mudafaa naziri James Mattisniñ ricasına binaen milliy mudafaa qanun leyhasına kirsetilgen edi.
Söz, 2017 senesi Kongresste ekseriyet tarafından qabul etilgen Amerika muhaliflerine sanktsiyalar vastasınen qarşılıq kösterüv Qanunına köre kirsetilgen sanktsiyalar aqqında kete.
Moskvanıñ istiqrarsızlıq areketleri, şu cumleden, saylâvlarğa qarışuvı içün cezalamaq maqsadınen kirsetilgen bu qanunnıñ, Rusiye mudafaa sanayısınen iş tutqanlarğa qarşı sanktisyalar kirsetilüvinen alâqalı bölügi de bar.
