Rusiye nezareti altındaki Qırım Yuqarı mahkemesi iyülniñ 26-nda apellâtsion şikâyetni qanaatlendirerek, Bağçasaraydaki «Hizb uTahrir işi»niñ üç iştirakçisi olğan Timur İbragimov, Seyran Saliyev ve Server Zakiryayevniñ apis muddetini uzattı. Bu aqta Qırım.Aqiqat muhbiri haber ete.
Mahkeme oturışuvı qapalı rejimde keçti.
Mahkemeci, bir basanmaq mahkemesiniñ qararını olğanı kibi qaldıraraq, adliyecilerniñ apellâtsion şikâyetini qanaatlendirmedi, yani Saliyev, İbragimov veZakiryayevniñ avgustnıñ 9-na qadar apiste qaluv muddetinen bağlı qararı deniştirilmedi.
Adliyeci Edem Semedlâyevniñ malümatına köre, avgustnıñ 8-zi ya da 9-nda işbu dava iştirakçileriniñ cezalav tedbirini uzatuv boyunca tahqiqatçınıñ nevbetteki muracaatı baqılacaq eken.
«Mahkemeci, aqrabalarnıñ mahkemege kirsetilüvi ve imaye altındaki şahıslarnıñ mahkeme zalında şahsen bulunmasınen bağlı muracaatını red etti. Davanıñ diger üç iştirakçisi olğan Süleyman (Marlen) Asanov, Memet Belâlov ve Ernes Ametov boyunca mahkeme, apellâtsion şikâyetniñ qırımtatarcağa tercime etilmegenine esaslanıp, öz teşebbüsinen kün tertibinden çıqarıp taşladı. Mahkeme dava materiallarını uyğun şekilde ketirilmesi içün birinci basamaq mahkemesine keri qaytardı», – dep ikâye etti Semedlâyev.
2017 senesiniñ oktâbr ayında Rusiye telükesizlik hadimleri Bağçasaraynıñ altı sakinini tutıp alğan edi. Bular – Timur İbragimov, Marlen Asanov, Memet Belâlov, Seyran Saliyev, Server Zakiryayev ve Ernes Ametov. FSB olarnı Rusiyede ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
Mayısnıñ 21-nde Qırımda «Qırım birdemligi»niñ koordinatorı Server Mustafayev ve qırımtatar musulmanı Edem Smailov tutulıp alınğan edi. Olarnıñ işi Bağçasaraylı «Hizb ut-Tahrir işi»nen birleştirildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
