İtaliya ükümeti Rusiye tarafından ilhaq etilgen Qırımnı tanımay ve ABniñ sanktsiyalar siyasetine riayet etmek niyetinde, dep bildirdi parlament oturışuvında İtaliya tış işleri naziri Enzo Moavero Milanezi. Bu aqta Ansa agentligine esaslanğan «Avropa aqiqatı» haber ete.
Nazirniñ sözlerine köre, İtaliye ükümeti «halqara uquqqa er zaman sayğı kösterilmeli» dep saya.
Haber etilgenine köre, Milanezi deputat Laura Boldrininiñ, 2014 senesi mart ayında Rusiyeniñ Qırımda ötkergen «referendumını» imaye etkenine dair İİN başı Matteo Salvininiñ beyanatınen bağlı sualine cevap bergen.
Daa evel İtaliya baş naziriniñ yardımcısı ve iç işler naziri Matteo Salvini The Washington Postqa bergen intervyusında, Rusiye Ukrainağa bağlı Qırımnı ilhaq etmege aqqı bar edi, Ukrainada keçken Degerlik İnqilâp aqqında ise, «yalan inqilâp» dep aytqan edi.
Daa soñra, Ukraina TİN Salvini aytqan sözleri boyunca izaat bermesi içün İtaliyanıñ Ukrainadaki elçisi Davide La Cecilianı çağırğan edi. O, Ukraina TİN naziriniñ avrointegratsiya boyunca muavini Olena Zerkalnen körüşken vaqıtta, Ukrainanıñ suvereniteti ve topraq bütünligi boyunca İtaliyanıñ pozitsiyası «açıq ve izçen» olmağa devam etkenini bilidrdi.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
