Rusiye nezareti altındaki Qırım parlamenti, parlamentniñ başı Vladimir Konstantinovnıñ milletlerara munasebetler komitetiniñ reisi vazifesine teklif etken Yuriy Gempelnin namzetine qol tuttı.
Bu aqta iyülniñ 24-nde Qırım parlamentiniñ saytı haber ete.
Haber etilgenine köre, namzetke qol tutqan soñ, Qırım parlamenti milletlerara munasebetler komitetiniñ reisini kerek tertipke binaen saylâmaq kerek.
Daa evel Yuriy Gempel almanlarnıñ Qırım Milliy-medeniy cumhuriyetine yolbaşçılıq yapqan edi.
Haber etilgeni kibi, milletlerara munasebetler komitetiniñ sabıq reisi Edip Gafarov Qırımnıñ rusiyeli parlament başınıñ yardımcısı vazifesine tayin etildi.
Aynı zamanda Kreml nezareti altındaki Qırım parlamenti başınıñ yardımcısı Remzi İlyasov istifa arizası yazğanı aqqında haber etilgen edi.
Halqara teşkilâtlar Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
