İyülniñ 24-nde «FIND&FREE» informatsion kampaniya çerçivesinde Kyivde Rusiye elçihanesi ögünde «Bayramsız doğğan kün» aktsiyası ötkerildi, dep haber ete Qırım.Aqiqat muhbiri.
Aktsiya teşkilâtçısı olğan «KrımSOS» cemaat teşkilâtınıñ sözlerine köre, iyülniñ 17-nde Qırımtatar Milliy Meclisiniñ azası qırımtatarı Ervin İbragimov 33 yaşını toldurmaq kerek eken, lâkin «aqrabaları eki yıldan berli Ervinniñ ne yerde olğanını bilmegen soñ, bayram quvançsız keçti».
Aktsiya vaqtında faaller elçihane kirişi ögünde masa yerleştirip, üstünde qoyulğan tort üzerine Qırımda ğayıp olğan insanlarnı temsil etken 16 dane çıraq yerleştirdiler. Ayrıca faaller masa ögüne birer-birer barıp İbragimovğa bahşışlar berdi, amma soñunda bile «olarnı kimse kelip almadı».
Aktsiyanı Ervin İbragimovnıñ babası Umer ziyaret etip, er ay elçihane ögüne kelip onıñ oğlu tapılğanını talap etkenleri içün aktsiya iştirakçilerine minnetdarlıq bildirdi.
Bizler, afsus ki, bayram yapıp olamaymız. Ervin eki ytıldan berli evinde yoq, ana-babası eki yıldan berli onıñ ne yerde olğanını bilmey, eki yıldan berli cemaatçılıq Rusiye akimiyetinden: «Ervin ne yerde?» dep soray, - dep ikâye etti «KrımSOS» cemaat teşkilâtınıñ koordinatorı Tamila Taşeva.
Aktsiya çerçivesinde faaller Rusiyeden ilhaq etilgen Qırımda zoraki ğayıp olğanlar boyunca tahqiqat keçirilmesini talap etti.
Qırım ilhaqından soñ, yarımadada hususan qırımtatarları ğayıp olıp başladı. Bu arada Rusiye nezaretindeki Qırım Taqiqat Komiteti «yarımadada qırımtatarları kütleviy bir şekilde ğayıp olmay» dey.
Faallerniñ malümatına köre, Rusiye Qırımnı ilhaq etkenden soñ, Qırımnıñ 44 sakini coyulğan, 16-sı aqqında ale daa iç bir malümat yoq, 6-sı çlü olaraq tapıldı, daa ekisi – apishanelerde tutula.
