Qırım sakinleri topraq bergisi tölenecegine dair bildirüvler kelip başladı, dep haber ete Qırım.Aqiqat Radiosı efirinde «Nedvijimost Sevastopolya» rieltorlar Derneginiñ prezidenti Grigoriy Apresov. Bu arada Apresov Qırımda Rusiye topraq bergisi yüksek olmaycaq dep saya.
«İmtiyaz saibi olğanlardan ğayrı – pensionerler 6 sotkağace bergi tölemey –bergini topraq saipleriniñ epsi töleycek. Umumen alğanda bu normal bir al. Devlet hızmetleri portalında hususiy odası olmağanlarğa mektüp şekilnde bildirüvler kelip başladı. Meselâ, 4 sotka içün 75 ruble. Normal, insan aqıllı, kimseni qorquzmaycaq bir bergi», – dep saya mutehassıs.
Bu aqta tafsilâtlıca Qırım.Aqiqat saytında «Qırım aftası: topraq bergisi ve Rusiyeniñ erzaq kontrsanktsiyaları» maqalesini oquñız.
Aynı zamanda Qırım sakinleri bücet üzerine yañı bir yük olıp minecek dep iddia ete. Qırım.Aqiqat Radiosı diñleyicilerinden biri, bu bergini ödemege küçü yetmeycek dep şikâyet etti.
«Men yañğız yaşağan pensionerim. Vaqtı zamanında topraq anamnıñ adına yazılğan edi. Pensionerler iç bir vaqıt tölemey ediler, endi men 10 biñden tölemege mecbur qalacam. Maña birisi bunı kapik dep ayta. Menim içün er ay, bağışlarsıñız, amma bu 120 ruble de para, esabımdan kesilecek», – dep ikâye ete adını aytmağan bir Qırım sakini.
Qırımdaki Rusiye Bergi hızmetiniñ maşümatına köre, 140 biñge yaqın Qırım sakini bu yıldan başlap 180 biñ topraq damartısı içün bergi ödemeli. Bergi 2017 senesi yanvarnn 1-ne qadar esaplandı. Bergi bu künden itibaren keçken künge köre tahsil etilecek.
