Adliyeci Edem Semedlâyev, «kütleviy tarzda terrorizmge» çağıruvnen bağlı cinaiy iş çerçivesinde psihiatrik ekspertiza içün Aqmescit psihiatriya hastahanesinde tutulğan qırımtatar faali Narima Memedeminovnı ziyaret etti.
Semedlâyev Qırım.Aqiqat muhbirine haber etkenine köre, ekimler Memedeminovnen er kün subet keçire ekenler.
«Nariman oña kelgen pek çoq mektüpni kösterdi ve cevapları yazılğan qısmını, maña berdi. Bundan da ğayrı o pek çoq oquy eken ve onıñ hastahane kütüphanesine kirmesine izin bergenler. Yaza ve oquy: zaten bu - sağlam insan o yerde oğraşacaq yekâne işidir. Men ziyaretke barğanda bölükniñ baş ekimi ögüme çıqıp, Nariman ne derece namuslı, oqumış, terbiyeli bir insan olğanını ayttı», – dep ikâye ete Semedlâyev.
Adliyeciniñ sözlerine köre, Memedeminov psihiatriya hastahanesinde tutulğanına menfiy baqa eken.
«Bu onıñ ğurur ve menligine toquna dep saya ve nasıl etip sağlam bir insannı böyle bir yerge yollamaq mumkün olğanını añlap olamay. Elbette, o yerniñ şartları SİZOğa nisbeten daa da yahşı. Eñ azından ağzına qadar tolu üceyreler yoq, lâkin er ne ise de o anda muayyen bir grafikke köre tutula. Ekspertiza içün o anda iyülniñ 26-na qadar qalacaq, ondan soñ bir daa SİZOğa qaytarılacaq», – dep añlattı adliyeci.
Ukraina Yuqarı Radasınıñ İnsan aqları boyunca vekâletlisi Lüdmila Denisova Rusiyeden vatandaş faali, qırımlı bloger, Nariman Memedeminovnıñ Qırım psihiatriya hastahanesine mecburen yatqızılğanına dair malümat bergenini talap etken edi.
Mayıs 15-te Rusiyeniñ kontroli altında olğan Aqmescitniñ Kiyevskiy rayon mahkemesi, terrorizm propagandasında qabaatlanğan qırımtatar faali, vatandaş jurnalisti Nariman Memedeminovnıñ tevqif muddetini dört ayğa uzattı.Memedeminov avgustnıñ 15-ne qadar tahqiqat izolâtorında qalacaq.
Martnıñ 23-nde Qırım MC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden evelki taqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesini «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
