Kyivde yerleşken Vernadskiy adına Tavriya milliy universiteti al-azırda anda oqumağa kirmek istegenlerden 3 biñ dane ariza alğan. Bu aqta Qırım.Aqiqatqa iyülniñ 19-nda TMU rektorı Vladimir Kazarin ikâye etip berdi.
Qıyaslanıp baqılacaq olsa, keçken sene universitet oldı olacağı 1200 dane ariza alğan.
«Vernadskiy adına Tavriya universiteti Kyivde ğayrıdan açılğanından berli, mennen beraber ilk eşelon sıfatında Qırımdan universitetke çıqqan 18 kişiden başlağan kollektiv olaraq 5 biñ kişigece yetti. Eger Kyivge kelmek ve işke kirmek fursatını beklegen menim meslekdeşlerim kelmegen ve çalışmağan olsa edi, böyle tez yükseliş aqiqatqa çevirilmez edi. Hususan birleşken işbu küç-quvetnen universitet bir universitet olaraq inkişaf etmege devam ete», – dep qayud etti o.
Mevzunen bağlı olaraq: «Biz sizlerge yardım etermiz»: Kyivde TMU qırımlı abituriyentlerge neler teklif ete
«Bıltır universitet 1200 dane ariza qabul etken olsa, bu yıl, al-azırda artıq sayı 3 biñ arizanı keçti. Keçken senege nazaran, köstergiçler eki qat arttı», – dep ilâve etti Kazarin.
2015 senesiniñ başında Qırımnıñ rusiyeli akimiyeti Vernadskiy adına Tavriya milliy universitetini lâğı etti. Aynı yılı yarımadada «federal universitet» meydanğa ketirildi, onıñ terkibine bir qaç aliy oquv yurtu ve şu cümleden TMU, Georgiyevskiy adına Qırım devlet tıbbiyet universiteti ve bir qaç diger ilmiy muessise kirdi. «Qırım federal universiteti»niñ strukturasına 13 umum tasil ve ilmiy muessise kire.
Vernadskiy adına TMU 2016 senesi Ukrainanıñ qıta qısmına köçti.Universitet esasında ilhaq etilgen Qırım talebeleri ve abituriyentlerniñ oquvğa kirmesi içün qısqartılğan programalar çalışa.
