BMT halqara mahkemesi Rusiyege Qırımtatar Milliy Meclisi yasağını lâqu etüv mecburiyeti aqqında hatırlattı dep bildire iyülniñ 19-nda Ukraina tış işler nazirligi.
Haberge binaen, cumaaqşamı künü BMT Halqara mahlemesi ukrain tarafını, Rusiyege qarşı 2017 senesi aprelniñ 19-nda çıqarılğan ve Moskvanı «qırımtatar halqınıñ vekâlethanelerini, şu cumleden Meclisni imaye etüv aq-uquqlarını sıñırlamaqtan qaçınması»nen bağlı buyruğını becergenine dairpozitsiyası aqqında malümat berdi.
«Rusiye Federatsiyası işbu açıq-aydın buyruqnı bozdı ve 2016 senesi aprel ayında qabul etken Meclisnen bağlı yasağını lâğu etmedi. Taraflarğa yollağan mektübinde mahkeme işbu buyruqnı becerme mecburiyetini tasdıqlay ve 2019 senesi yanvarniñ 18-ne qadar Rusiyeden buyruqnıñ becerilüvinen bağlı atılğan konkret adımlar boyunca malümat bergemege mecbur ete», – denilmekte haberde.
Ukraina Rusiyeden Meclis faaliyetiniñ yasağını lâğu etüv yolunen özüniñ halqara mecburiyetlerini becermege çağıra dep qayd ete Ukraina TİN.
Mevzunen bağlı olaraq: «Meclisni terrorist etip köstermek»: BMT Halqara mahkemesine FSB ne şekilde «azırlana»
2017 senesi Ukraina BMT Halqara mahlemesine, Ukrainağa nisbeten tecavuz yapıluvı çerçivesinde ırqçılıq ceetinden diskriminatsiya areketlerinde iştirak etüv ve Ukrainada terrorizmge qol tutuvnen bağlı maliyeviy yardım köstergeni sebebinden Rusiyege qarşı dava açqan edi.
Ukraina BMT Halqara mahlemesine işbu vaziyetniñ uzatılmamaq kerek olğanını bildirerek, muvaqqat tedbirler körülmesi ricasınen ayrıca soratma yollağan edi. 2017 senesi aprelniñ 19-nda mahkeme Ukraina talabına binaen Rusiyege qarşı muvaqqat tedbirler qabul etken edi.
