Rusiye nezareti altındaki Aqmescitniñ Kiyevskiy rayon mahkemesi iyülniñ 19-nda «narazılıq meydanı»nıñ faali Fazıl İbraimovnıñ cezasını deñiştirip, ev apsinde qalmaq üzre SİZOdan çıqardı.
Fazıl İbraimov avgustnıñ 14-ne qadar ev apsinde qalacaq.
Qırım.Aqiqat muhbiri haber etkenine köre, faalniñ daa evel SİZOda tutuluv şartları deñişkeninden dolayı, tahqiqat içün bu qararınıñ deñiştirilmesine sebep olğanını bildire.
Faalniñ aqrabaları jurnalistlernen qonuşmağa red etken em de ayrıca adliyeci Edem Semedlâyevke davanen bağlı izaat bermekni yasaqlağan.
Fevralniñ 15-nde Aqmescitniñ Strelkovaya soqağı etraflarında Rusiye İİNniñ Qırım idaresiniñ hadimleri «topraq damartısını işğal etip alğan bir teşkilâtçınıñ» evinde tintüv yaıplğan edi. Rusiye politsiyasınıñ hadimleri «narazılıq meydanı»nıñ faali olğan Fazıl İbraimovnı tutıp alaraq, Rusiye İİN idaresiniñ şeer bölügine ketirgen edi.
Qırım KHV haber etkenine köre, İbraimov resmi olaraq «Rusiye Cinaiy-protsesual kodeksiniñ 91 maddesine binaen cinayet işlegninde şeklenüvi sebebinden tutulıp alınğan edi».
Fazıl İbraimov, sürgünden soñ avdet etken qırımtatarlar işğal etip alğan topraqlar yani «narazılıq meydanlarınıñ» resmiyleştirilmesi içün alıp barğan kürüşinen meşurdır.
Strelkovaya «narazılıq meydanı» yerleşken yerde «Krımskaya roza» adlı 9 biñ kişilik yañı rayon qurulması planlaştırıla. Mesken evlerden ğayrı bu yerde mektep, balalar bağçası, sport kompleksi ve tükânlar qurulması planlaştırıla. Şimdi mında esasen repatriantlar yaşay.
