AB azaları olğan devletlerniñ elçileri Keriç köpüriniñ qurtucılığınen alâqadar olğan 6 şahısqa qarşı sanktsiyalar kirselecegine dair qarar qabul etti. Bu aqta Ukraina prezidenti Petro Poroşenko özüniñ Facebook saifesinde yazmaqta.
«Bu areket Ukrainağa bağlı Qırımnıñ ilhaqı ya da vaqtınca işğal etilmesine keçmişte, al-azırda ve kelecekte alâqadar olğan ister şahıs, ister şirketniñ cezalanacağını isbat etmektedir», – dep ilâve ete prezident.
İyün ayında Ukraina tış işleri naziri Pavlo Klimkin Avropa Birliginiñ sanktsiyalar cedveline ilhaq etilgen Qırımda insan aqlarının bozuluvına ve Keriç köpüriniñ qurulışı içün mesül olğanlarnı qoşmaq kerek olğanı aqqında aytyqan edi.
İyünniñ 18-nde Avropa Birliginiñ Şurası Rusiye ilhaq etken Qırımğa qarşı kirsetilgen sanktsiyalarnı bir yılğa uzattı. Sıñırlavlar AB territoriyasında bölükleri olğan şahıs ve şirketlerge nisbeten kirsetilip, 2019 senesi iyünniñ 23-ne qadar devam etecek.
Keriç boğazı üstünden qurulğan köpürniñ avtoyol qısmı yengil maşnalarnıñ areketi içün mayısnıñ 16-nda açıldı. Köpürniñ demiryol qısmı şimdilik qurulıp bitirilmedi.
Ukraina prezidenti Petro Poroşenko, Rusiye ilhaq etken Qırımda Keriç köpüriniñ qurğanı Kremlniñ halqara uquqqa sayğısızlıq köstergeniniñ nevbetteki misali olğanı aqqında aytqan edi.
Avropa birligi Rusiye ve ilhaq etilgen Qırım arasında qısmen açılğan Keriç köpürini tenqit etken edi. 2014 senesi Qırım ilhaq etilgen soñ, Ukraina Rusiye ile tizilgen köpür qurulışınen bağlı muqaveleden çıqtı.
