Qırımda Bağçasaray «Hizb ut-Tahrir işi» boyunca tutulıp alınğan «Qırım birdemligi» birleşmesiniñ koordinatorı Server Mustafayevniñ babası rayonnıñ rusiyeli prokuraturasına çağırılğan. Bu aqta iyülniñ 18-nde Qırım.Aqiqatqa qırımtatar faali Zair Smedlâyev ikâye etip berdi.
«Bu, Server Mustafayevniñ evinde tintüv keçirilgen ve özü tutulıp alınğan maalde rusiyeli telükesizlik organları küç qullanğanınen alâqalı. Olar onıñ qollarını qayırıp yerge yıqtırğan ve yüzüni tırmalağanlar. O, telükesizlik hadimleriniñ aşırı areketlerinden dolayı prokuraturağa muracaat etken. Prokuratura da onı davet etken, işte», – dedi Smedlâyev.
Onıñ sözlerine köre, saat 14:30 o öz adliyecisinen beraber alâ daa Rusiye prokuraturasında buluna.
Mayısnıñ 21-nde Rusiye telükesizlik hadimleri «Qırım birdemligi» birleşmesiniñ koordinatorı Server Mustafayev ve qırımtatar musulmanı Edem Smailovnı tutıp alğan edi. Olarnıñ işi Bağçasaray «Hizb ut-Tahrir işi»nen birleştirildi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
