Keriç memuriyeti Bagerovo musulman mezarlığında baştaşlarnıñ parçalanmasında qabaatlı olğanlarnı tapqan. Keriçniñ rusiyeli memuriyeti yolbaşçısınıñ muavini Dilâver Melgaziyev iddia etkenine köre, vandalizmni yerli ösmürler yapqan.
«Olarnıñ areketleri Yediquyu rayonı ösmürler işleri komissiyasınıñ oturışuvında baqılacaq, ana-babalarına memuriy bozuluv boyunca protokollar yollandı, ayrıca qanunğa binaen başqa tedbirler körülecek», – dep yaza Melgaziyev özüniñ Facebook saifesinde.
İyülniñ 17-nde Qırımnıñ Yediquyu rayonı Bagerovo köyünde yerleşken musulman mezarlığında belli olmağan şahıslar 15 danege yaqın baştaşnı parçalağanı belli oldı.
İyünniñ 18-den 19-na keçken gecesi Qarasuvbazarda belli olmağan şahıslar cami divarı üzerine natsist timsalleri sızğan ediler. 2018 senesi fevral ayında ise, Aqmescitniñ «Strelkovaya» qasabasında vandallar cami mülkiyetine zarar yetkizgen ediler.
