Ekstremizm propagandasında qabaatlanğan Novıy mir sakini İsmail Ramazanov iyülniñ 14-nde SİZOdan çıqarıldı. Bu aqta Facebookta «Qırım birdemligi» birleşmesi haber ete.
Bir kün evel bu cinaiy iş boyunca qabaatlanğan şubeli şahısnı yarım yıldan ziyade apiste tutmaq yasaq olğanını esapqan alaraq, mahkeme Ramazanovnıñ apiste qaluv müddetini uzatuvnen bağlı taqiqatçınıñ muracaatını red etti. Ramazanovnıñ ailesi onı iyülniñ 16-nda yibererler dep beklegen maalde, o eki kün evel çıqtı. Qırımlı vatandaş artıq evinde ve azat etilgeninen hayrlamaq içün soy-aqrabalarınen dostları keldi. Ramazanovnıñ özü, bu qadar erte azat etilecegine ümüt etmegeni aqqında ayttı.
«16-na kündüz küni olur dep (azat eterler – QA) bekley edim. Belli ki, daa ziyade tutıp olamaylar, añlaşıla. Kereginden evel çıqara bileler, ziyade tutmağa aqları yoq. Azat etilsin degen kâğıt kelgen soñ memuriyetniñ ziyade tutmağa aqqı yoq», – dedi Ramazanov Facebookta «Qırım birdemligi»niñ saifesinde ötkerilgen video yayında.
İsmail Ramazanov yanvarniñ 23-nde tevqif etilgen edi. Aynı künü onıñ Novıy Mirdeki evinde tintüv ötkerldi. Rusiye Taqiqat komiteti onı Zello internet-radio vastasınen estremzim propagandası yapqanında qabaatlağan edi.
