İyülniñ 17-nde ABD prezidenti Donald Trump Vladimir Putin ile körüşken soñ ötkerilgen matbuat konferentsiyası neticesine nisbeten yapılğan tenqitke qarşılıq kösterdi.
«Şimdilik, büyük meblağlar celp eterek, men NATO ile pek yahşı körüşüv keçirdim, Rusiyeden kelgen Vladimir Putinnen de eñ yahşı körüşüvimni ötkerdim. Afsus ki, bu aqta haber etilmey – yalan haberler aqıldan azğan», – dep yaza o Twitterde.
Mevzunen bağlı olaraq: «Körüşüv nasıl keçecegini kimse bilmey edi»: Donald Trump ve Vladimir Putin ne aqqında añlaştı
Americanıñ Cumhuriyetçi ve Demokrat firqaları, iyülniñ 16-nda Helsinkide Vladimir Putin ile körüşken soñ, Rusiyeniñ Amerika saylâvlarına qarışqanınen bağlı amerikan istihbaratınıñ hulâsalarına qol tutmağanı sebebinden prezident Donald Trumpnıñ çıqışından çorlanğanlarını bildirdi.
İyülniñ 16-nda Helsinkide Trump ile Putin arasında körüşüv keçti. Matbuat konferentsiyası devamında Trump bir kere de olsa Ukraina lafını açmadı, albuki körüşüvden evel taraflar, diger mevzularnen biraber Ukraina aqqında da laf etecekler denilgen edi.
