Rusiye hastahaneleri Qırımda alınğan tibbiy tasilni tanımay, şunıñ içün talebelerniñ ekseriyeti ya Ukrainanıñ qıta qısmına, ya da qomşu Rusiyege oqumağa kete. Bu aqta Qırım.Aqiqat Radiosı efirinde, yerli hastahanede bir kereden işten boşatılğan 10 mutehassısnen bağlı haberni izaatlağan Aqmscitli ekim Andrey Bereza ikâye etip berdi.
«Tıbbiyet universiteti Sağlıq nazirligi ihtiyarından Tasil nazirligi ihtiyarına keçirildi. O statusını coydı, bir çoq kafedralar dağıldı ekimlerni oqutmağa litsenziyası yoq. Biz alğan kategoriyalar tek Qırımda qabul etile – olar Rusiyede bile qabul etilmey! Bu sebepten universitetni pek çoq insan terk etti – tasil de uydurıq sayılır. Tabiiy ki, ekim sayısı da azaldı. Ya Ukrainağa, ya da Rusiyege oqumağa keteler», – dep qayd etti ekim.
Daa evel Rusiyeniñ «Sputnik v Krımu» radiosı efirinde Aqmescit klinik bala hastahanesiniñ baş ekimi Anatoliy Oleynik, çalışqan 11 ekim arasından qomşu Rusiyeden kelgen 10-nı işten boşatılğanı aqqında aytqan edi. Onıñ sözlerine köre, esasen Rusiyedeki tuvğan regionında işleri yürüşmegen «dolandırıcılar» kele eken.
İyün ayında Qırım sağlıq naziri Aleksandr Golenko yarımada sağlıq muessiselerinde ekim yetişmemezligi olğanı ve 700-den ziyade ekim yetişmegeni aqqında ikâye etken edi. O, sovetler devrindeki sistema qaytarılğanını istegen edi: eger bücetke bağlı hadimler tibbiyet oquv yurtından soñ çalışmağa mecbur olsa, Qırımğa kerek olğan kadrlar yollanıla bilir.
