Qırımtatar Milliy Meclisiniñ reisi Refat Çubarov ABD ve Rusiye prezidentleri Donald Trump ve Vladimir Putin keçirgen ortaq matbuat konferentsiyasından dolayı raatsız olğanını bildirdi, lâkin Qırım sakinlerini telâşlanmamağa ve yarımadanıñ keleceginen bağlı meseleni faalleştirmege çağırdı. Bu aqta o iyülniñ 16-nda özüniñ Facebooktaki videoblogında söz yürsetti.
«Epiñizni, hususan Qırımda yaşağanlarnı, olar üzerinde er bir ekrandan gece-kündüz qıçırıp oturğan ruspropaganda maşnasını ne qadar diñlemek isteseler de – eger Rusiye informatsion menbalarından ğalebenen alâqalı bildirüvler eşitmege isteseler de, olarğa tenqidiy ceetten yanaşıñız.İç bir türlü Rusiye ğalebesi yoq. Telaşlanmağa acet yoq, çünki ABDniñ kerçek devlet siyaseti, işbu eñ küçlü devletniñ pozitsiyasını yalıñız prezident belgilemey, Rusiye tarafına doğrultılğan sanktsiyalarnen bağlı pek çoq qararlar mevcut ve böyle bir körüşüv neticesinde olar deñiştirilmez ya da şekilsizleştirilmez», – dep qayd etti Çubarov.
Meclis reisi Putinniñ Qırımnen bağlı sözlerini subetdeşleriniñ ağzından eşitmege pek hoş kelmegenini ve mantra kibi tekrarlanğanını añlamaq eyecanlı safsata olğanına bir delil olğanını ayttı.
Çubarovnıñ fikrine köre, körüşüvden soñ prezdentlerniñ ekisi de öz vatandaşları ögünde özlerini aqlamağa areket etecek. Devlet içinde, şu cumleden pensiya yaşınen alâqalı bir sürü problemler bar ekende öz reytingini kerek seviyede tutmaq içün Putinniñ ğalebelernen bağlı bildirüvleri pek muimdir.
Onıñ sözlerine köre Trump, esasen tışarıdan berilecek bir çoq sualler ve birleşken Avropa ile munasebetlerni saqlap qalmaq ve saire kibi ciddiy meselelerden qaçınmaq içün, o öz muhaliflerini şaşırtmağa areket etecek.
«Biz ne yapayıq? Qırımnıñ azat etilmesi içün butün küçümizni masraf etmelimiz. Bizler Qırımnıñ azat etüv meselesini, artıq azat etilgen Qırımnıñ kelecegi meselesini, uzatılamamaq kerek olğan Anayasağa kirsetilecek deñişmeler meselesini faalleştirmek kerekmiz. Qırımnıñ azat etilüvi ve Ukrainağa bağlı Qırımnıñ keleceginiñ faalleştirilüvi – işte böyle bir körüşüvlerden soñ peyda olğan er bir fikir, qorquvlarğa berecek cevabımız olmalı.Suvirenitet ve topraq bütünliginiñ tüklenüvi aqqında açıq-aydın aytmalımız. Qırım azat etilecek – bunda asla şübelenmemeli», – dep qayd ete Çubarov.
İyülniñ 16-nda Helsinkide Trump ile Putin arasında körüşüv keçti. Matbuat konferentsiyası devamında Trump bir kere de olsa Ukraina lafını açmadı, albuki körüşüvden evel taraflar, diger mevzularnen biraber Ukraina aqqında da laf etecekler denilgen edi.
