Qırımtatar Milliy Meclisiniñ reisi, halq deputatı Refat Çubarov ilhaq etilgen Qırımğa Dnipro suvunı satuv fikrini «asla qabul etilmez» dep ayttı.
Qırım ükümetiniñ sabıq yolbaşçısı Anatoliy Mogilövnıñ işbu sözlerini izaatlar eken, Çubarov, Rusiye Qırımdaki arbiy gruppirovkasını quvetlendirgeni aqqında hatırlattı ve Ukraina yarımadağa suv bermege qarar berse, onı ilk-evelâ Rusiye arbiyleriniñ ihtiyacı içün qullanılacağını ayttı.
«Qırımğa suv satılğanını teklif etken şahıslar, utanmadan bazı muim meseleler aqqında unutalar. Qırımğa yollanğanlar ilk-evelâ arbiy saanıñ quvetlendirilmesi içün qullanılacaq. Suv meselesi Qırım ile siyasiy mabüslerniñ azat etilüvi öçerçivesinde baqılabile. Bu basit bir mesele degildir. Anda olar Qırımda ilk-evelâ arbiy baza, raketa ve uçaq olaraq qvetlenmege isteyler. Keliñiz bu meselede olarğa yardım etmeyik de, Rusiye tez vaqıtta Qırımnı terk etmesi kerek şeylerni yapayıq», – dep qayd etti Çubarov iyülniñ 16-nda özüniñ Facebooktaki videoblogında.
O, 2015 senesi Qırımtatar Milliy Mecvlisiniñ teşebbüsinen Qırımnıñ memuriy sıñırında Qırım ile Ukrainanıñ qıta qısmı arasında mal alış-verişnini toqtatqan ve Meclisniñ malümatına köre, mallarnıñ büyük bir qısmı yarımada üzerinden Rusiyege alıp ketilgeninen alâqalı yarımadanıñ vatandaş tosmeninen bağlı vaqialar aqqında hatırlattı. Çubarovnıñ sözlerine köre, neticede, Rusiye pek qısqa bir muddet içinde Qırımnen bağlı masraflarnı bir qaç qatqa arttırmağa mecbur qalğan edi.
Mevzu boyunca: Qırımğa berilgen suv Azaq deñizine deñiştirüv: Ukraina ile Rusiye arasında bazarlıq yapılabilemi?
Auyrıca Refat Çubarov 2015 senesi dekabr ayında Ukrainanıñ qıta qısmından Qırımğa elektrik berülüvi kesilgeninen bağlı vaqialar aqqında da, bundan soñ ilhaq etilgen yarımadanı teminlev meselesi «devletlerara munasebetler meselesine aylânğanını»hatırlatıp keçti.
Qırımtatar Milliy Meclisiniñ reisi halqara normalarğa binaen «tecavuzcı-devlet işğal etken topraqlarnı temin etmege mecbur» olğanını qayd etti.
Qırım ükümetiniñ sabıq yolbaşçısı Anatoliy Mogilöv daa evel «112.Ukraina» televizion kanalınıñ efirinde, Ukraina ükümeti «iqtisadiy esasta» Qırımğa Dnipro suvını bermege devam etmeli dep aytqan edi.
Ukraina ükümeti Mogilövniñ sözlerine daa içi bir izaat bermedi.
Rusiye Qırımnı ilhaq etken soñ Ukraina, Dnipronıñ baş yatağını yarımadanen bağlağan Şimaliy Qırım kanalı boyunca yarımadağa suv bermekni toqtattı.
Dnipro suvı olmağanı sebebinden Qırımnıñ suvaruv vastasınen çalışqan ziraaçılığı bayağı zarar kördi. Qırımnıñ 2014 senesi suvarılğan 140 biñ gektarından, yerli menbalar vastasınen suvarılğan yalıñız 17 biñ gektar toprağı qaldı. Pirniç artıq iç asralmay. Bir yıldan soñ suvarılğan tarlalar miqdarı 13,4 biñ gektarğa tüşti.
