Link açıqlığı

Saatnıñ esas haberi

«Taqatsızlıq ve baş aylânuvı». Adliyeci açlıq tutqan uquqimayeci Kuku aqqında ikâye etip berdi


Emir-Usein Kuku
Emir-Usein Kuku

Yaltalı «Hizb ut-Tahrir işi»niñ iştirakçisi uquqimayeci Emir-Usein Kukunıñ sağlıq vaziyetini «qanaatlendirici» demek mumkün. Qırım.Aqiqatqa Kukunıñ adliyecisi Sergey Loktev ikâye etkeni kibi, uquqimayeci glükoza almağa red etken, onıñ başı aylânıp başlay eken.

«O, Sentsovnen diger siyasiy mabüslerge qol tutaraq, açlıq tutmağa devam ete. Sağlıq vaziyeti aqqında «qanaatlendirici» dep aytmaq mumkün. Tünevin onıñ analizlerini alğanlar: sözde er şey biy yoruq. Al-evalına baqqanda: taqatsızlıq ve baş aylânuvı bar. O, glükoza almağa red etken. Bunı, Sentsovnen bağlı olaraq aytılğanı kibi, tedavi maqsatlı açlıq dep aytırlar dep tüşüne. İç muçeleriniñ ağırtanına şikâyet ete», – dep ikâye etti Loktev.

Onıñ sözlerine köre, SİZO hadimleri Kukunı açlıqtan vaçgeçirmege tırışqanlar, lâkin uquqimayeci niyetinden qaytmağan.

İyünniñ 26-nda açlıq ilân etken Emir-Usein Kuku 9 kg azdı.

İyülniñ 10-nda Emir-Usein Kukunı Rusiyeniñ Rostov-na-Donu şeeri SİZOsından belli olmağan tarafqa alıp ketilgen. SİZO hadimleri Sergey Loktevke onıñ imayesi altındaki şahıs ne yerge bulunğanı aqqında aytmaqnı red etkenler. Daa soñra Kukunı tibbiy muessisege teşkerüv içün alıp ketkenleri aqqında belli oldı.

Mevzunen bağlı olaraq: «Onı qanunsızlıq mecbur etti»: Emir-Usein Kuku bir aftadan berli açlıq tuta

Mayıs ayınıñ soñunda Şimaliy Kavkaz okrugınıñ arbiy mahkemesi Yaltalı «Hizb ut-Tahrir işi»niñ altı iştirakçisiniñ tevqif müddetini üç ayğa uzattı.

Bu iş boyunca qabaatlanğan Arsen Cepparov, Refat Alimov, Emir-Useyin Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada tutlğan ediler. Olar Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanlarında qabaatlana.

Rusiye arbiy mahkemesi Yaltadalı «Hizb ut-Tahrir işi»ni Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinleri Rostov-na-Donu şeerine yollandı.

Ukraina Tış işleri nazirligi Rusiyeden Yaltalı «Hizb ut-Tahrir işi» iştirakçileriniñ azat etilmesini talap ete.

«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG