Link açıqlığı

Saatnıñ esas haberi

Tahqiqat izolâtorından ğayıp oluv – Qırım.Aqiqat Daily


Emir-Useyin Kuku
Emir-Useyin Kuku

Açlıq tutqan aq-uquq qorçalayıcısı, Yaltadaki «Hizb ut-Tahrir işi» figurantı Emir-Useyin Kuku Rusiyede Rostov-na-Donu şeerinde bulunğan tahqiqat izolâtorından ğayıp oldı, lâkin soñundan tapıldı.

Advokat Sergey Laptev imayesi altında olğan şahıs ile körüşmek içün kelgende, Kuku tahqiqat izolâtorında yoq edi. Daa soñra aq-uquq qorçalayıcısınıñ yerinde bulunğanı ve teşkerüv içün tibbiy müessisege alıp ketilgeni belli oldı. Lâkin advokatnı oña öyle de yibermediler.

Eziyetlev neticesinde berilgen ifadeler

Mustafa Cemilevniñ qorantasını taşığan aydavcı Ahtem Mustafayev, Bağçasarayda yaqalanğanda onı Rusiye FSBsiniñ hadimleri eziyetledi, dep bildirdi. Onı, başına çuval taqıp, bastırıqqa alıp ketti, anda urdı ve diger eziyetler qullandılar: başını sım-sıqı etip skoçnen sıqtıra ve tizler üstünde turmağa mecbur ete ediler. Mustafayev, böyle etip, onı Qırım müftisi Emirali Ablayevge ait evniñ tutaştırılmasına dair ifadeler bermege mecbur etecek ediler, dey. Eziyetlevler nasıl yapıldı ve FSB hadimleri neler eşitmek istey edi, bizim materialımızda oquñız.

Qırım köyünde korruptsion skandal

Aqmescit rayonınıñ Saraylı Qıyat (Mirnoye) köyünde yerli sakinler ve cemiyetçiler «Birdem Rusiye»den deputat Aleksandr Miloşenkoda bir qaç hektar topraq peyda olğanına diqqat ettiler. Ondan ğayrı, deputat, Badana (Perovo) köyüdeki «Yaşlı vatandaşlar ve saqatlarğa içtimaiy hizmet berüv merkezi»ne Lada Kalina Cross avtomobilini ediye etti, lâkin onıñ içün paralar ve ediyeniñ özü ne yerden kelgenini köstermedi. Resmiy malümatlarğa köre, Milaşenkonıñ yıllıq keliri 848,5 biñ rubleni teşkil ete. Bu vaziyet aqqında daa tafsilâtlı malümatnı bu yerde oquñız.

Memuriy sıñırdaki keçirüv noqtaları nasıl deñişecek?

Ukraina Nazirler kabineti, Qırım ile memuriy sıñırdaki «Kalançak» ve «Çongar» kiriş ve çıqış keçirüv noqtalarınıñ donatılmasına 105 million hrivnadan ziyade para ayırdı. Bütün bular, şaraitlerni eyileştirmek, memuriy ve naqliy hizmetler bermek ve komfortlı servis zonasını yaratmaq içün yapıldı. Lâkin bunıñ kerekligi aqqında davalar ale daa devam ete. Keçirüv noqtalarınıñ donatılması neni közde tuta, Qırım.Aqiqat Radiosı efirinde müzakere ettiler.

Azav deñizine qarşılıq olaraq Qırım içün suv

New York Timesniñ sabıq muhbiri Ceyms Bruks, Rusiye Ukrainadan Azav deñizinde gemiler qatnavına qarşılıq olaraq Dnepr suvunıñ Şimaliy Qırım kanalından Qırımğa berilmesini almağa tırışa, dep zan ete. Onıñ fikrine köre, bu mesele AQŞ ve Rusiye prezidentleriniñ kelecekteki körüşüvinde ortağa qoyulacaq. Böyle bazarlıqnıñ ihtimalı barmı ve o, nege ketirmek mümkün – bizim materialımızda oquñız.

Qısqadan

  • Aqyarda Rusiye arbiyleri suvaltı diversantlarını yaqalamağa ögrene ediler.
  • Britaniya jurnalisti Con Uorren Grem Broderipke, Qırımnı ziyaret etüv qaidelerini bozğanı içün Ukrainağa kirüv yasaq etildi.
  • Oleg Sentsovnıñ qız qardaşı Natalya Kaplan ağasınıñ tutqan açlığı ve alı aqqında ikâye etti. O, 59-ncı kün açlıq tuta.
  • Tailandda suv ile basılğan qobadan bütün balalarnı ve olarnıñ idmancılarını qurtardılar.

Eñ soñunda bir video

Rusiye aktrisası Liya Ahecakova seksen yaşlığını qayd etti. Onıñ Ukraina, Qırım ve Sentsov aqqında neler degenini seyir etiñiz

XS
SM
MD
LG