Kreml nezareti altindaki Qırım Yuqarı mahkemesi Bağçasaraylı «Hiz ut-Tahrir işi»niñ eki iştirakçisi - «Qırım birdemligi»niñ faali Server Mustafayev ve musulman qırımtatarı Edem Smailovnıñ avgustnıñ 9-na qadar imayecisiniñ SİZOda tutuluv muddetine qarşı bergen şikâyetini red etti. Bu aqta Qırım.Aqiqat muhbiri haber ete.
Şikâyetniñ baqıluvınen bağlı mahkeme oturışuvı qapalı rejimde keçti. Mahkemeci işbu iş iştirakçileriniñ havfsızlığı telüke altında olğanını esapqa alaraq, mahkeme oturışuvınıñ qapalı rejimde keçmesine qarar berdi.
Mustafayev ve Smailov mahkeme binasına ketirilmedi ve oturışuv videobağ vastasınen keçti.
Mustafayevnıñ adliyecisi Sergey Legostov belli bir sebeplerden dolayı mahkeme oturışuvına kelip olamadı. Tevqif etilgen qırımtatar faaliniñ menfaatlrını mahkemede tayin etilgen adliyeci Yemelyanov temsil etti.
«Öz şikâyetimde men Kyiv rayon mahkemesiniñ apis muddetini uzatuvnen alâqalı qararınıñ lâğu etilmesini, imayem altındaki şahıs daa da yımsaq muitke yani ev apsine keçirilmesini, ayrıca men mahkemeniñ qapalı rejimde keçirilüvi lâğu etilgenini rica etken edim», – dep ikâye etti Edem Smailovnıñ adliyecisi Konstantin Rustemov.
Esas talaplarnıñ iç birisi qanaatlendirilmeyip, appelâtsion şikâyet red etildi dep ilâve etti o.
Mayısnıñ 21-nde Rusiye telükesizlik hadimleri «Qırım birdemligi» birleşmesiniñ koordinatorı Server Mustafayev ve qırımtatar musulmanı Edem Smailovnı tutıp alğan edi. Olarnıñ işi Bağçasaraylı «Hizb ut-Tahrir işi»nen birleştirildi.
«Qırım birdemligi» birleşmesiniñ koordinatorı Dilâver Memetovnıñ malümatına köre, Smailov soñki 15 yıl devamında Bağçasarayda musulman diniy merasimleriniñ ötkerilmesinen oğraşqan.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
