Avropa şurasınıñ reisi Donald Tusk , Avropa şurasınıñ Rusiye taarfından ilhaq etilgen Ukrainağa bağlı Qırımnıñ tanılmamasınen bağlı pozitsiyası deñişmey.
İyülniñ 9-nda bu aqta o Brüsselde, Ukraina prezidenti Petro Poroşenko ve Avropa komissiyasınıñ prezidentiJean Clayde Junker ile keçken Ukraina – Avropa birligi sammitiniñ ortaq matbuat konferentsiyası neticesinde ayttı.
«AB Ukraina topraq bütünligi, suvereniteti ve mustaqilligine qol tutmağa devam ete. Qırım ve Aqyarnıñ qanunsız ilhaqını tanımayuvımız da deñişmey qalmaqta», – dedi Tusk.
O, AB «yaqında Avropa Birligine kirmege yasaq etilgen şahıslarnıñ cedveli kenişletilgenini» da qayd etip keçti.
«Bu adım Qırım yarımadasında Rusiye prezdentiniñ saylâvları ve Ukrainadan izin alınmadan Keriç köpüri qurulmağa başlağanından soñ atıldı», – dep ilâve etti o.
İyünniñ 18-nde Avropa Birliginiñ Şurası Rusiye ilhaq etken Qırımğa qarşı sanktsiyalarnı daa bir yılğa uzattı.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
