Aqyarlı «Hizb ut-Tahrir işi» iştirakçisi Nuri Primovnıñ anası Raime açlıq tutmaqnı toqtattı. Bu aqta Qırım.Aqiqatqa iyülniñ 9-nda İnsan aqları boyunca Qırım kontakt gruppasınıñ koordinatorı Abdureşit Cepparov ikâye etip berdi.
«Haber alğanıma köre, iyülniñ 3-ne aqşam Raime Primova ahır-soñu açlıq tıtmamağa qarar bergen», – dedi Cepparov. İyülniñ 4-nde uquqimayeci, Primova hastahanege alıp ketilgeni «ve onıñ al-areketlerine baqılacaq olsa, açlıq tutmağnı toqtatmadı», dep haber etken edi.
Primova açlıqnı toqtatqanınen bağlı malümatnı Qırım.Aqiqatqa qırımtatar faali, uquqimayeci Lütfiye Zudiyeva da tasdıqladı. Onıñ sözlerine köre, iyülniñ 8-nde Primova daa hastahanede yata eken.
Mervzunen alâqalı: Raime Primova. Oğlu içün tutulğan açlıqnıñ onuncı künü
İyünniñ 20-nde Qırımda Ukraina vatandaşı, Aqyardaki «Hizb ut-Tahrir işi» iştirakçisi Nuri Primovnıñ anası, 68 yaşındaki Raime Primova açlıq ilân etti. O, Rusiye tarafından mahküm etilgen oğlunıñ deñiştirüv cedveline kirsetilgenini talap ete.
Raime Primovanıñ ekinci gruppa saqatlığı bar, o 68 yaşında. Primovanıñ bir büyregi yoq. Oña ciger hastalığı diagnozı qoyuldı.
Mayıs ayınıñ soñunda, Rusiye koloniyasında bulunğan Aqyarda «Hizb ut-Tahrir işi»niñ iştirakçisi Nuri Primov ceza izolâtorına qapatıldı.
2017 senesiniñ sentâbr ayında Rostov-na-Donu şeerindeki Şimaliy Kavkaz okrugınıñ arbiy mahkemesi, «Hizb ut-Tahrir» işi boyunca qabaatlanğan Aqyar sakinleri Ferat Seyfullayev, Rustem Vaitov ve Nuri Primovğa umumiy rejimli islâh etici koloniyada beşer yıl berilgenine dair ükümni ilân etti.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
