Link açıqlığı

Saatnıñ esas haberi

Bağçasaraylı «Hizb ut-Tahrir işi» mahkemesinde qabaatlağan taraf şaatları sorğulandı


İyülniñ 5-nde Rusiyeniñ Rostov-na-Donu şeerindeki Şimaliy-Kavkaz okrugınıñ arbiy mahkemesinde Bağçasaraylı «Hizb ut-tahrir işi» baqıluvı devam etti. «Qırım birdemligi» haber etkenine köre, oturışuvda videobağ vastasınen Aqmescitten qoşulğan qabaatlayıcı taraf şaatlarını diñlediler.

«Birinci şaat, qabaatlanğan dört kişiden tek Enver Mamutovnen körüşkeni aqqında ayttı. Başaqalarını asla tanımay eken. Nevbetteki şaatnıñ şaatlığına binaen, o Enver Mamutovdan ğayrı, kimseni tanımağanı belli oldı. Soñki kişinen o bir qaç sefer körüşken eken. Üçünci şaat qabaatlanğanlarnıñ epsi aqqında musbet şeyler ayttı», – denilmekte haberde.

Mahkeme adliyeci Emil Kurbedinovnıñ oturışuv esnasında fotoğa çeküvnen bağlı muracaatını qanaatlendirdi. Nevbetteki oturışuv iyülniñ 6-na tayinlendi.

Bir kün evel keçken mahkeme oturışuvında qabaatlağan taraf şaatları Rusiye prokuraturasınıñ tezislerini tasdıqlaycaq iç bir şey haber etmediler.

2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede dört Bağçasaray sakini: Zevri Abseitov, Remzi Memetov, Rustem Abiltarov ve Enver Mamutov tutulııp, terrorizmde qabaatlandı. Olarnı, Rusiyede terroristik tanılğan «Hizb ut-Tahrir» teşkilâtında iştirak etkenlerinde şübeli dep sayalar.

Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.

«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.

XS
SM
MD
LG