Link açıqlığı

Saatnıñ esas haberi

Qırımda sürgün hatırasına bağışlanğan tedbir iştirakçisiniñ mahkemesi başqa künge avuştırıldı


Rusiye nezareti altındaki Qırım Yuqarı mahkemesi iyülniñ 5-nde Aqmescitte qırımtatarlalarnıñ sürgüni hatırasına bağışlanğan tedbir iştirakçisi Seytasan Asanovnıñ Rusiye politsiyası bergen apellâtsion şikâyetinen bağlı mahkeme oturışuvı başqa künge avuştırıldı. Bu aqta Qırım.Aqiqat muhbiri haber etmekte.

Daa evel şaatlarnıñ imayesini ilân etken politsiya hadimi kelmegeni sebebinden mahkeme oturışuvı iyülniñ 6-na avuştırıldı. Şaat sıfatındaki Rusiye politsiyasınıñ hadimleri ne keçken oturışuvğa, ne de iyülniñ 5-nde keçken oturışuvğa kelmedi.

«Mahkemeci davanı, mevcut materiallar esasında şaatlarnıñ şaatlıqlarına baqmadan körip çıqmağa qarar berdi», – dep ayttı Seytasan Asanovnıñ imayecisi Nazim Şeyhmamabetov.

Seytasan Asanov mayısnıñ 17-nde aqşam keç maalde Aqmescitte qırımtatarlar toplu yaşağan Aq-Meçet rayonında keçken qırımtatarlarnıñ sürgüni hatırasına bağışlanğan tedbirden soñ tutulıp alınğan edi.

Olar arasında çağına yetmegen balalarnen beraber tutulğan yigirmige yaqın kişini beş polis maşinası ile Aqmescitniñ çeşit içki işler bölüklerine alıp ketken ediler.

Daa soñra tutulğanlarnıñ bazıları, başta añlatuvlarını, parmaq izlerini ve DNE nümunelerini alınaraq, yiberildi.

Mayısniñ 18-nde Kreml nezareti altındaki Aqmescit Merkeziy rayon mahkemesi Seytasan Asanovğa dair «polis hadiminiñ qanuniy talaplarına boysunmağanı aqqında cinaiy işniñ yürütilmesini, cinayet terkibiniñ olmağanı sebebinden qapattı».

Qırımtatar halqını Qırımdan sürgün etüv qurbanlarınıñ hatıra künü er yıl mayısnıñ 18-nde qayd etile. Şu künü qırımtatarlar tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.

XS
SM
MD
LG