Ekstremizmde qabaatlanğan İsmail Ramazanov tutulğan Aqmescit SİZOsınıñ şartları «Rusiye qanunınıñ şartlarına uymay ve insanniñ menligini tüşüre». Bu aqta Qırım.Aqiqatqa onıñ adliyecisi Aleksey Ladin ayttı.
O, Ramazanovnıñ tutulıp şartları sebebinden Avropa insan aqları mahkemesine (AİAM) şikâyet etmek niyetinde.
«Olarnıñ tavanında bir soy mantarlar peyda olğan, bir şeyler tamıp tura eken. Üst qatta verem hastaları tutulğanı içün bu bayağı kederli mesele. Sanitariya şartları, tabir caiz ise, pek müşkül», – dep iza etti Ladin.
Qırım.Aqiqat muhbiri haber etkenine köre, mahkeme teneffüsi vaqtında Ramazanov 12,5 m2lik üceyrede 4 yataqlı yerde 5 kişi tutulğanı ve olar nevbetnen yuqlağanı aqqında aytıp bergen.
Onıñ sözlerine köre, üceyre asla avalandırılmay eken, pencereçik o qadar ufaq eken ki, SİZOda tutlğanlar, olarğa aş berilgen «yemlikni» qapatmamağa rica ete ekenler.
«İsmail sağlığına şikâyet etmey, tışqı körünişi fena degil. Çaresi olğanı qadar. Lâkin, onıñ SİZOda tutuluv şartları qanun ve adiy insanşartlarına uymay», – dep ilâve ete adliyeci.
Daa evel mahkeme İsmail Ramazanovnıñ SİZOda qalmasınen bağlı muddet uzatılğanına dair şikâyetini red etken edi. O, iyülniñ 16-na qadar taqiqat izolâtorında qalacaq.
Mevzunen bağlı olaraq: Aleksey Ladin: «Milliy mensubiyeti – İsmail Ramazanovniñ işini ağırlaştırğan unsurdır»
İsmail Ramazanov, yanvarniñ 23-nde Rusiye telükesizlik hadimleri Novıy Mirdeki evini tintken soñ ekstremizm propagandasında qabaatlanğan edi. Daa soñra mahkeme, şübheli dep tanılğan şahısnı tevqif etti.
Rusiyeniñ Qırım boyunca Tahqiqat komiteti, internet rediosı vastasınen ekstremistik materiallarnıñ tarqatılmasında qabaatlanğan Aqmescit rayonınıñ sakinine qarşı taqiqatçılar tarafından cinaiy iş açılğanı bildirdi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirilmege başladı.
