Aqmescitte Kreml nezareti altındaki Qırım Yıqarı mahkemesi, vesiqanı imzalamağan içün ekstremizm propagandasında qabaatlanğan İsmail Ramazanovnıñ tevqifi uzatılğanınen bağlı appelâtsion şikâyetiniñ baqıluvını red etti.
İyülniñ 3-nde Qırım.Aqiqat muhbiri haber etkenine köre, mahkemeci Oleg Lebed şikâyetniñ baqıluvını red etip, iş materiallarını Aqmescit rayon mahkemesine qaytarmağa qarar bergen.
Tevqif etilgen şahısnıñ adliyecisi Aleksey Ladinniñ sözlerine binaen, oturışuv esnasında Ramazanov apellâtsion şikâyetiniñ kerçek olğanını tasdıqlağan ve imzalamağa azır eken.
«Buña köre, men onıñ imayecisi olaraq, onıñ noqta-i nazarına qol tutmamazlıq yapamaz edim, yani qanun ceetinden mahkeme qanunğa uyğun qarar qabul etti. Afsus ki, bu qanuniylik saylâmadır», – dep izaatladı işbu vaziyetni Ladin.
Ramazanov iyülniñ 16-na qadar taqiqat izolâtorında qalacaq.
Mevzunen bağlı olaraq: Aleksey Ladin: «Milliy mensubiyeti – İsmail Ramazanovniñ işini ağırlaştırğan unsurdır»
İsmail Ramazanov, yanvarniñ 23-nde Rusiye telükesizlik hadimleri Novıy Mirdeki evini tintken soñ ekstremizm propagandasında qabaatlanğan edi. Daa soñra mahkeme, şübheli dep tanılğan şahısnı tevqif etti.
Rusiyeniñ Qırım boyunca Tahqiqat komiteti, internet rediosı vastasınen ekstremistik materiallarnıñ tarqatılmasında qabaatlanğan Aqmescit rayonınıñ sakinine qarşı taqiqatçılar tarafından cinaiy iş açılğanı bildirdi.
Qırım ilhaqından soñ yarımadada rusiyeli akimiyet mustaqil jurnalistler, cemaat ve qırımtatar Milliy areketiniñ faalleri, Meclis azaları ve «Hizb ut-Tahrir» ile alâqası olğanında şeklengen musulmanlarnıñ evlerinde sıq-sıq tintüvler keçirilmege başladı.
