ABD prezidenti Donald Trump rusiyeli zenaatdaşı Vladimir Putinnen keçirgen sammitinde Qırımnıñ Rusiyege ait olğanını tanısa bile, amerika Kongressi böyle bir qararğa qol tutmaz, degen fikirni beyan etti «Avrasya demokratik teşebbüsi» halqara ğayrı ticariy teşkilât müdiri Piter Zalmayev Qırım.Aqiqat Radiosınıñ efirinde.
«Sanktsiyalarnıñ lâğu etilmesi içün Rusiye tarafına doğru atılğan er angi bir adım – atta Donald Trumpnıñ ağzından Qırımnıñ de-facto tanılması içün bir söz çıqqanını farz etsek de – episi bir Kongresste rey berilmek kerek olacaq. İç bir şey qolaylıqnen çezilmey, men bellesem, şimdiki vaziyette Kongressteki ekseriyet böyle şeylerni qol tutmaz. Olar yaqın zamanda bu sanktsiyalarğa qol tutqan ediler», – dep qayd etti mutehassıs.
Rusiyeli siyasetşınas Leonid Radzihovskiy taraflar ilhaq etilgen yarımada meselesine toqunmağa sırası bile kelmez dep ayta eminliknen.
«Açıq-aydın belli ki, esas mesele Suriyenen bağlı olur, zira başqa meseleler de bar: meselâ, amerikalılarnı raatsızlağan rusiyeli hakerler, daima ğalebe qazanuv mevzusı olğan raketa ve cenk başlıqları mevzusı. Ayrıca Koreya, çünki Trump içün Rusiyeniñ ambargoğa qol tutqanı muimdir. Elbette, Ukraina meselesi de – mında bir ilerilev olmaz dep belleyim. Qırım meselesinde iç bir ilerilev olması mumkün degil», – dep yekünledi siyasetşınas.
ABD ve Rusiye prezdentleri Donald Trump ve Vladimir Putin arasındaki körüşüv iyülniñ 16-nda ötkerilmeli. İyün ayınıñ soñunda Trump prezidentniñ Air Force One uçağında jurnalistlerge Putinnen Suriye, Ukraina ve Qırım hususında, ayrıca rus hakerleriniñ amerikan saylâvlarına qarışqanı aqqında qonuşmaq istegeni aqqında aytqan edi.
Donald Trump ve Vladimir Putin eki kere halqara sammit lobilerinde körüşip, iç olmağanda, sekiz kere telefonda laf etken ediler. 2014 senesi Qırım ilhaq etilgen soñ ABD ve Rusiye prezdentleri ayrıca körüşmegen ediler.
