Qırımda Bağçasaraylı «Hizb ut-Tahrir işi» boyunca tevqif etilgen qırımtatar faali Server Mustafayev ukrain ve halqara uquq imayecileri, siyasetçi ve faallerge muracaat yazaraq, siyasiy qabaatlavlarnen tutulğan Qırım sakinlerine qol tutmaq kerekligini qayd ete.
Qırımtatar faali yazğan mektübini halqqa «KrımSOS» cemaat teşkilâtı bildirdi.
«Bizler defalarca aytqan zorbalıqsız küreş içün bugünki kerçek ayatta bizler serbestlikten marum etilemiz ve, afsus ki, bazen ayatımızdan da. Faqat bizim teslim olmağa aqqımız yoq, çünki pek çoq şey yaptıq, çoq şey coydıq, ileride de bizni çoq şey bekley», – dep qayd ete Server Mustafayev.
O, Qırımda repressiyalarğa qarşılıq köstermek ve zarar körgen Qırım sakinlerini qorçalamaq içün çetel mutehassıs ve siyasetçilerinden ükümet tışında çalışacaq iş gruppası teşkil etmek kerekligini qayd ete.
«Men bizim halqımıznen Qırımda qabaatsız olğan sakinlerniñ aqqını qorçalağanda biri-biri deñiştirip çalışabilecek pek çoq faal qaldırıp ketkenimden memnünim. Bağlar qoğtı, leyhalar bitti dep bellemeñiz, lütfen. Deñiştirilmeycek insanlar yoq denilmesin, olar yerine başqaları kelir. Men özümni de doğrulıq ve adalet oğrundaki küreş meydanından silip atmayım», – dep qayd ete Server Mustafayev.
Mayısnıñ 21-nde Qırımda «Qırım birdemligi»niñ koordinatorı Server Mustafayev ve qırımtatar musulmanı Edem Smailov tutulıp alınğan edi. Olarnıñ işi Bağçasaraylı «Hizb ut-Tahrir işi»nen birleştirildi.
İyünniñ 14-nde Krem nezareti altındaki Qırım Yuqarı mahkemesi Bağçasarayda tutulğan qırımtatar faali Server Mustafayevniñ tevqif muddetiniñ uzatıluvınen bağlı adliyeci şikâyetini red etken edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
