Link açıqlığı

Saatnıñ esas haberi

«Tavrida» trassası qurulğan vaqıtta 130 biñ terek ğayıp etildi – Qırım ekologiya nazirligi


«Tavrida» trassası qurucılığı neticesinde ilhaq etilgen Qırımda 133 849 danege yaqın terek, 121 749 dane yaqın çalı ğayıp etildi.

Bu aqta Qırım.Aqiqat muhbiriniñ sortatuvına Qırım ekologiya ve tabiat resursları nazirligi bergen cevabında söz yürsetilmekte.

Nazirlik hadimleri qayd etkenine köre, 2017 senesi ösümliklerniñ pıçılıp alınuvı içün izin Qırım avtomobil yolları hızmeti ve AO «Vısokaçestvennıye avtomobilnıye dorogi» şirketlerine berilgen ve olar bir yıl içinde bu ösümlikler yerine başqalarını oturtacaqlarına mesul etilgen.

Kreml nezareti altındaki Qırım ekologiya ve tabiat resursları naziri Gennadiy Narayev yanvar ayında, «Tavrida» trassası boylap ösümlikler oturtılması içün 220 mln ruble (160 biñ grina civarında –QA) masraf etilecegi aqqında aytqan edi.

Rusiye baş naziri Dmitriy Medvedev «Tavrida» avtoyolu içün kerek paralarnı Rusiye ükümeti «zorlanmadan tapqanını» iddia etken edi. İlk başta «Tavrida» trassasınıñ tahminiy maliyeti 43 milliard t-rubleni teşkil ete edi. Ondan soñ leyha 85 milliardqace paalılaştı, daa soñra ise – 139 milliard rublegece barıp yetti.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti. Ukraina prezidenti Petro Poroşenko 2015 senesi oktâbrniñ 7-nde munasip qanun imzaladı.

XS
SM
MD
LG