İlhaq etilgen Qırımda rusiyeli ükümet ve onıñ tarafdarları qarşılıq köstergeni sebebinden qırımtatar bayrağı Kününe insanlarnı aşkâre olaraq toplamaq imkânsız olıp qaldı. Bu aqta Qırım.Aqiqat Radiosı efirinde qırımtatar halqı Qurultayınıñ MSK başı Zair Smedlâyev ayttı.
«Evelki zamanlarda bayram Aqmescitniñ merkeziy meydanında tantanalı şekilde, milliy bayrağımıznı tiklenerek, muzika, kontsert programması ve eglenceli çıqışlarnen qayd etile edi. Afsus ki, Qırımda er angi bir tedbirni ilân etmek imkânsız – yerli akimiyet ve onı sevgenler qarşılıq köstereler», – dep qayd ete Smedlâyev.
Bu şartlarda qırımtatarlar öz bayraqlarını iş yerlerinde, ev ve maşnaları üzerine dalğalandıracaqtır dep ilâve etti o.
İyünniñ 26-nda qırımtatarlar Milliy bayraq Kününi qayd ete. Bayram künü olaraq 1991 senesi iyünniñ 26-27-nde Aqmescitte ötkerilgen ekinci qırımtatar halqı Qurultaynıñ birinci künü saylânğan edi.
Bu yıl Ukraina informatsion nazirligi qırımtatar bayrağı Kününe bağışlanğan umummilliy ictimaiy reklam kampaniyası taqdim etti.
